Хотугулуу-Илиҥҥи федеральнай университет хаачыстыбалаах, ситимнээх үөрэҕи иҥэрэрин таһынан, устудьуон бары өттүнэн сайдарыгар кыаҕы биэрэр. “Эдэр саас” саайтка анаан устудьуоннар айар, уопсастыбаннай-туһалаах үлэҕэ кыттыыларын уонна олоҕурбут көрүҥүнэн үөрэххэ көстөхтөрүнэ тугу былаанныылларын туһунан кэпсээтилэр.
ХИФУ мэдиссиинэҕэ институтун устудьуона Ньургустаана Попова – волонтер-медик. Кини баҕа өттүнэн хамсааһыҥҥа кыттыыта “Азия оҕолоро” оонньууларыттан саҕаламмыт. Иккис кууруска үөрэнэ сылдьан, бөлөҕөр бииргэ үөрэнэр оҕолорун сэргэ медик-волонтердар эрээттэригэр киирбит. “Биһиги бу хайысханы олус сэҥээрбиппит. Мэдиссиинэ өттүнэн көмөлөһөр, тэрээһиннэри ыытар баҕа санаа үөскээбитэ. Маҥнай араас ыарыылартан сэрэхтээх буоларга ыҥырар аахсыйалары тэрийсиигэ көмөлөспүппүт. Онтон миигин анал бырайыактарынан координатор буоларга ыҥырбыттара”, — диэн устудьуон кэпсиир.
Медик-волонтердар – мэдиссиинэ тэрилтэлэрин – көмөлөһөөччүлэрэ. Кинилэр бастакы көмөнү оҥорорго үөрэтэллэр, успуорт уонна маассабай тэрээһиннэри арыаллыыллар, хаан туттарыы уонна силии (костный мозг) донорствота сайдарыгар дьайаллар, оскуола үөрэнээччилэригэр идэҕэ бэлэмнэнии (профориентация) хайысхатыгар көмөлөһөллөр, уо.д.а. үлэни ыыталлар. “Дьаҥ саҕаланыаҕыттан саастаах дьоҥҥо көмө оҥорор өрөспүүбүлүкэтээҕи волонтердар куорпустара аһыллыбыта. Биһиги эмиэ онтон туора турбатыбыт: аһылык уонна эмп-томп тиэрдиитин саҕалаабыппыт. Хамаандабыт улахан. Өрөспүүбүлүкэ үрдүнэн биир санаалаахтарбытын көрдүүбүт”, — диир Ньургустаана.
Устудьуоннар эргиччи сайдалларыгар улахан тирэҕинэн устудьуоннар тэрилтэлэрэ буолар. Устудьуоннар идэлээх сойуустарын таһынан, интэриэстэринэн араас куруһуоктар уонна спорт сиэксийэлэрэ бааллар, Устудьуоннар уопсайдарын холбоһуктаах сэбиэтэ (ОССО) өрүү көмөлөһөргө бэлэм.
Геологоразведочнай факультет устудьуона Тимур Кириллов Устудьуоннар уопсайдарын холбоһуктаах сэбиэтин (ОССО) бэрэссэдээтэлин солбуйар. “10-11-с кылаастарга үөрэнэр эрдэхпинэ, ХИФУга үөрэххэ киирдэхпинэ тустаах сэбиэккэ киирэрбэр сүбэлээбиттэрэ. Оччолорго чугас доҕотторум бары устудьуоннууллара. Устудьуон олоҕуттан кэпсээччилэр, уопсастыбаннай үлэ күннээҕи үөрэҕи сэргэхситэр дииллэрэ. Бэйэм саастыылаахтарбын кытта санаабыт сөп түбэһэр эйгэтигэр үлэлиирбин, атын дьону кытта алтыһарбын уонна араас тэрээһиннэри былаанныырбын сөбүлүүбүн”, — диэн Тимур санаатын үллэстэр.
Эдэр киһи номнуо үһүс сылын көхтөөх кыттааччынан буолар. Араас таһымнаах тэрээһиннэри ыыталлар: устудьуон куоратын олохтоохторугар, университет культурнай-маассабай тэрээһиннэрэ, итини таһынан араас аһымал кэнсиэрдэр буолаллар диэн Тимур кэпсиир: “Устудьуоннар уопсайдарын холбоһуктаах сэбиэтэ (ОССО) – биир иллээх дьиэ кэргэн. Университет бэйэтин устудьуоннарын ирдэнэр усулуобуйанан барытынан хааччыйар. Бэлиэтээн аастахха, университекка былырыын “Точка кипения” аһыллыыта, үөрэнээччилэргэ эрэ буолбакка, бүтүн университет улахан хардыытынан буолар”.
Автодорожнай факультет устудьуона Егор Сивцев кыра эрдэҕиттэн айар үлэҕэ сыстаҕаһын кэпсиир. Ырыанан, уруһуйунан, үҥкүүнэн, чэпчэки атлетиканан, волейболунан, остуол тиэнньиһинэн уонна саахыматынан дьарыктаммыт.
Ол эрээри, мантан барытыттан ырыаны уонна үҥкүүнү ордорбут. Арыый улаатан баран өссө биир дьарыгынан умсугуйбут – хомуска тардыынан. “Бэйэм үөрэнэн саҕалаабытым, кэлин ааттаах-суоллаах хомусчуттар куурустарын ааспытым. Хомус көмөтүнэн саҥа кыахтар, дойдуларга сылдьар, үрдүккэ талаһар саҕахтар арыллыбыттара. Билигин даҕаны салгыы сайдарга дьулуһабын”, — диэн Егор этэр.
Эдэр киһи, университет ыытар тэрээһиннэригэр көхтөөхтүк кыттар, ону тэҥэ, хамсык дьаҥын иннинэ «СтудВесна», «World of Dance», «БАЙКАЧ, «Гордость Нации» уо.д.а. Бүтүн Арассыыйатааҕы бэстибээллэргэ кыттара: “Мин өрүү хамсана-имсэнэ, кэлэ-бара сылдьарбын сөбүлүүбүн. Маҥнай барытынан тэҥҥэ дьарыктанар уустук этэ: үөрэнэр, үлэлиир, айар үлэҕэ бириэмэ ордорор. Ол эрээри, устудьуон олоҕун саамай кэрэтэ бу эбээт – олох биирдэ эрэ бэриллэр. Көхтөөх олох үөһүгэр сылдьар буолан доҕотторум элбэхтэр. Олох киэҥ аартыгар үктэннэхпитинэ даҕаны сибээспитин быһыахпыт суоҕа, бэйэ-бэйэбитигэр көмөлөһүөхпүт”.
Устудьуоннар билигин ыраахтан олорон (дистанционно) үөрэнэллэр, университекка барар, доҕотторун, преподавателлэрин кытта көрсөр, туох даҕаны кыһалҕата суох устудьуон олоҕор төбөлөрүн оройунан түһэр күннэрин тулуйбакка-тэһийбэккэ күүтэллэр.
Көхтөөх ыччат олоҕурбут көрүҥүнэн үөрэнэ кэллэхтэринэ, аан дойду хамсык дьаҥын кыайдаҕына, атын устудьуоннарга анаан тэрээһиннэри ыытар, уопсастыбаҕа уонна төрөөбүт кыһаларыгар туһаны аҕалар былааннаахтар. Оҕолор итэҕэстэри-быһаҕастары туора илгэн, санааларын күүһүрдэн, талааннары, кыахтары арыйар устудьуоннар тэриллиилэригэр болҕомтолорун ууралларыгар ыҥыраллар. “Үтүө үтүөнэн төлөнөр”, — диэн бигэ эрэллээхтэр.
ХИФУ пресс-сулууспата.