Бу сайын бэс ыйыгар Инстаграмҥа Дьокуускайдааҕы атыы-эргиэн, экономическэй кэллиэһин устудьуоннара уопсайдарын усулуобуйата мөлтөҕүн туһунан таһаарбыттарын дьон улаханнык сөхпүтэ. edersaas.ru
Маны «Эдэр гвардия» халтай хаалларбатаҕа. Устудьуоннары кытта Ил Түмэн дьокутаата Александр Сусоев көрсөн, баар кыһалҕаны кэпсэппиттэрэ, быһаарсыбыттара. Көрсүһүү түмүгүнэн СӨ орто анал үөрэхтээһиҥҥэ ыччат сойууһун салайааччылара Вячеслав Хрон, Алексей Данилов, юрист Василий Попов, ХИФУ юридическай көмөҕө киинин салайааччы Алексей Иннокентьев уонна «Биир ньыгыл Арассыыйа» баартыйа «Эдэр гвардиятын» аппараатын салайааччы Раиса Контоева састааптаах анал хамыыһыйа тэриллибитэ. Сайыҥҥы сынньалаҥ кэмигэр сөптөөх үлэ ыытыллан, хамыыһыйа атырдьах ыйыгар ити кыһалҕаны быһаарыыга аналлаах Дьокуускайдааҕы атыы-эргиэн, экономическэй кэллиэһин салайааччыта Валентина Кривошапкина кыттыылаах мунньах тэриллибитэ.
Ити мунньах чэрчитинэн, устудьуоннар уопсайга олорор усунуостара кыччыахтааҕа, хосторуттан эрдэ тахсыбыт устудьуоннарга харчыларын төннөрөр уонна уопсайга олорооччулары улахан төрүөтэ суох үлэлэтэри тохтотор туһунан быһарыы ылыллыбыта.
Юрист Василий Попов: «Билигин тустаах кэллиэскэ 2017-2018 үөрэх дьылыгар уопсайга олоруу төлөбүрүгэр саҥа бирикээс таҕыста. Ол быһыытынан судаарыстыба бүддьүөтүн көмөтүнэн үөрэнэр устудьуоннар уоту туһаналлара учуоттанан туран, ыйга 658 солк. төлүөхтэрэ. Ол эбэтэр, уопсайга олоруу төлөбүрэ 2,25 төгүл аччаата», – диэн иһитиннэрдэ.
Александр ТАРАСОВ, «Саха сирэ» хаһыат, edersaas.ru