Дьокуускайтан Хотугулуу-Илиҥҥи федеральнай университеттан устудьуоннар Томпо улууһун Кириэс Халдьаайы орто оскуолатыгар ыалдьыттаатылар. Үөрэнээччилэри идэҕэ туһаайыыга сэргэх тэрээһини ыыттылар. Бүгүн тэрээһиҥҥэ кыттыбыт оҕолор тустарынан билиһиннэрэбит.
Оонньууга түмтүлэр
Программист үөрэҕэр бастакы сылын үөрэнэбин. Үчүгэй бөҕө күн ааста. Мин модератор оруолун толордум. Ооонньууга оҕолору тумэн, хамаандаларыгар аат толкуйдуулларыгар көмөлөһөн, оонньуу быраабылатын кэмиттэн кэмигэр быһааран биэрэн истим. Оруоллаах оонньуулар, холобур ыстаансыйаттан ыстаансыйаҕа ааһыыга полицейскайдар бааллар, хамаанда паспордаах буолар. Өскөтүн аата суох буоллаҕына полиция тутар. Ол тутуллубут киһини хамаанда дьоно быыһаатахтарына эрэ босхолонор. Дьэ, ол кэнниттэн эрэ салгыы атын ыстаансыйаларынан барар. Кириэс Халдьаайылар, уопсайынан, көхтөөх эбиттэр. Пассивнай да оҕолор бааллар. Элбэхтэ маннык, оҕолору тардар тэрээһиннэри тэрийэн истэххэ, оҕо көхтөөх буоларга үөрэнэр ,оттон ити хаачыстыба олоххо олус туһалаах. Оҕолорго туохтан да туора туран хаалбакка, барытыгар көхтөөхтүк кыттан иһиң, доруобуйаҕытын көрүнүҥ, успуордунан, муусуканан дьарыктаның, мэлдьи үөрэ — көтө сылдьың диэн сүбэлиибин, — диир Тарабукин Роберт.
Фортепианоҕа оонньуур Андриан
Оттон Андриан Собакин бэйэтэ суруйбут «The Lost Elf» ол эбэтэр нууччалыыта “Затерянный Эльф” диэн айымньытын фортепианоҕа оонньоон иһитиннэрбитин көрөөччү долгуйа иһиттэ. Бу муусукаҕа киһи тыанан баран иһэн кэрэ, соҕотох эльфы көрсөр. Эльф куотар, ол эрэн киһиэхэ эрэнэр. Кини киһи суолу буларыгар көмөлөһөр. Бу мифкэ олоҕурбут уһун кулгаахтаах, кынаттаах, үөһээңңи Эльф уонна Киһи уйулҕалара, кинилэр сырыылара биир фортепиано араас аккордугар эгэлгэ иэйиилээх муусука долгунугар биһигини көччүттэ. Бэҕэһээ онньообутуттан ураты өссө “Радостное настроение” диэн 2018-19 сылларга суруйбут муусукатын күндүргэтэр. Андриан киниэхэ муусука дьүрүскэнэ наар киирэрин кэпсиир. Оччоҕо ноутбугар баар бырагыраамаҕа айымньытын суруйар, ол кэнниттэн нотаҕа түһэрэр эбит.
— Билигин В. А. Босиков аатынан Муусука Үрдүкү оскуолатыгар иккис кууруска үөрэнэбин. Идэбинэн аранжировщик буолуохтаахпын. Бэйэм фортепианоҕа оонньуубун. Оттон үңкүүм туһунан эттэхпинэ, поппинг, робот, анимэйшн көрүңүнэн үңкүүлүүбүн. Бу үңкүүбэр үс көрүң үһүөн холбосто. Билигин айылҕаҕа сыһыаннаах муусуканы суруйа сылдьабын.
Оскуолабыт соччо уларыйбатах. Атах таҥаһын уурар сир оҥорбуттара олус үчүгэй. Оҕолор үөрэхтэрин сөпкө таллыннар, эксээмэннэрин ситиһиилээхтик туттаран, бэйэлэрэ баҕарар үөрэхтэригэр киирдиннэр диэн баҕа санаабын этэбин, —Андриан санаатын сэмэйдик үллэстэр.
Устудьуоннар сарсыныгар, айанныахтарын иннинэ тимуровскай хамаанданан ыалга мас хайытан, саһааннаан дьон-сэргэ махталын ыллылар.
Ыччаттарбытыттан астынныбыт, саха саргытыгар эрэннибит. Күндү оҕолорбутугар самныбат өркөн өйү, чиргэл тиит курдук чөл буолууну, өбүгэттэн харысхаллаах буолууну, төрүт удьуор уустан бэриллибит киһилии эйэҕэс майгыны баҕарабыт.
Ирина Харайданова,
Томпо, Кириэс Халдьаайы
Хаартыска: ааптар тиксэриитэ