Устудьуоннар үөрэхтэрэ түмүктэнэн, сайыҥҥы сынньалаҥнарын туһалаахтык атаараллар, үлэлииллэр-хамсыыллар.
Онон бүгүн устудьуоннар сайын тугунан дьарыктаналларын билистибит.
Александр Степанов, ХИФУ, 2 куурус устудьуона:
— Ханнык баҕарар устудьуон сиэссийэтин этэҥҥэ сабан баран, самаан сайыны «ыраас суобастаахтык» көрсүөн баҕарар. Үөрэнэн бүтээт даҕаны тута дойдулуубун. Уһун айаны айаннаан, бу кылгас да буоллар самаан сайыммытын туһалаахтык атаарбыт киһи диэн былаанныыбын. Дьоммор илии-атах буолан, араас үлэҕэ үлэлиибин. Оҕуруот көрүүтэ, дьиэ ис-тас үлэтэ элбэх буолар.
Алдынай Долаан, ЯПК, 2 куурус устудьуона:
-Мин үөрэхпинэн «Вожатское дело» диэн дьиссипилиинэнэн Приморскай кыраайга Большой Камень куоракка быраактыкалана сылдьабын. Быраактыкам быыһыгар өрөбүл ылан, дойдубут биир биллэр куоратыгар — Владивостокка доҕотторбун кытары баран күүлэйдээн сэргэхсийэбит. Владивосток куораты кэрийэн, араас кэрэхсэбиллээх сирдэрин көрдүбүт уонна куораты үөһэттэн «смотровой» диэн сиртэн көрдүбүт. Бүтүн куорат ытыска сытар курдук көстөр. Онтон киэһээтин Лазурная диэн бухтаҕа тиийэн сөтүөлээн ааспыппыт. Маннык араас куораттарга сылдьыахха наада эбит дии санаатым.
Анита Туприна, ХИФУ, 3 куурус:
— Мин сайыҥҥы былааным олус элбэх. Бастатан туран, биир улахан сыалым — «Манчаары оонньууларыгар» остуол оонньуутугар хабылык-хаамыска көрүҥэр ситиһиилээхтик кыттыы. Маны таһынан араас улуустарынан ыһыахтары кэрийэр былааннаахпын: Туймаада ыһыаҕын таһынан, Хаҥалас, Чурапчы, Сунтаар улуустарыгар тиийиэхпин баҕарабын.
Дьулусхан Иванов, АГАТУ, 1 куурус устудьуона:
— Мин бу сайыммын мээнэ-халты ыыппакка, үлэлээн харчы мунньунар санааҕа кэлбитим. Харчы мээнэ халлаантан түспэт диэн, төрөппүттэрбиттэн көрдөөмөөрү үлэлиэхтээхпин. 2-3 ый курдук үлэлээн харчы мунньабын уонна биир баҕа санаабын толорбут киһи диэн санаалаахпын.
Айталина Попова, СВФУ 2 куурус:
— Сотору быраактыкам бүппүтүн кэннэ, дойдубар дьоммор барыахтаахпын. Бэйэбит маҕаһыыннаахпыт, онно тиийэн үлэлиэхтээхпин. Үлэ быыһыгар, күүлэйдээн, сөтүөлээн сайыммын атаарыам диэн эрэнэбин. Аҕам дойдутугар Амма улууһугар бара сылдьыахпын баҕарабын. Оннук курдук сайыммын көхтөөхтүк, умнуллубаттык атаарыам.
Алина Диодорова, ХИФУ устудьуона