Ил Дархан Айсен Николаев бэҕэһээ бырабыыталыстыба мунньаҕар Дьааҥы улууһугар халаантан эмсэҕэлээбит нэһилиэктэри чөлүгэр түһэрии үлэлэрэ балаҕан ыйын 30 күнүгэр диэри түмүктэниэхтээхтэр диэн соругу туруорбута.
20 киһилээх устудьуоннар этэрээттэрин байыастара Дьааҥы улууһун Суордаах уонна Томтор нэһилиэктэригэр айаҥҥа туруннулар. Этэрээти Ил Дархан сорудаҕынан СӨ Ыччат дьыалаларын уонна социальнай коммуникациялар министиэристибэлэрэ тэрийэн ыытта.
Ыччат миниистирин солбуйааччы Надежда Мохначевская ыччаттары аэропорка киирэн атаарда. Кини бэлиэтээбитинэн, билигин Дьааҥы улууһугар ханнык баҕарар өйөбүл олус наада буолбут кэмэ.
Саха сирин Уопсастыбаннай палаатата уонна Дьааҥы улууһуттан төрүттээх биир дойдулаахтар Дьокуускай куоракка Курашов уулусса 24-гэр 4-с этээс 405-с кэбиниэтигэр гуманитарнай көмөнү хомуйа олороллор. Күн аайы үлэлиир ыстаапка бэйэҕит көмөҕүтүн туттарыаххытын сөп.
Елена ПОТОЦКАЯ, «Саха сирэ» хаһыат.
Хаартыска — СИА саайтыттан.