Устудьуоннар этэрээттэрэ халаантан эмсэҕэлээбит Дьааҥы улууһун сэлиэнньэлэригэр көмөлөһөллөр.
«Арассыыйа устудьуоннарын этэрээттэрэ» МООО эрэгийиэннээҕи салаата уонна М.К.Аммосов аатынан ХИФУ устудьуоннарын этэрээттэрэ Дьааҥыга кэлээт, халаантан эмсэҕэлээбит сэлиэнньэлэргэ көмөлөһөн үлэлээбитинэн бардылар.
—-Суордаахха нэһилиэк баһылыга оскуоланы өрө көтөҕөр соругу туруорбута. Балаҕан ыйа чугаһаан иһэр, оскуола үөрэх дьылыгар толору бэлэм буолара наада. Биһиги линолеумнарын ылан, муостатын көтүрэн оскуола муостатыттан уонна хочуолунайыттан ууну хачайдаабытынан барбыппыт. Түргэнник куурдар туһуттан түннүктэрин, ааннарын барытын устан ылбыппыт. Салгын сылдьарын курдук оҥордубут. Оскуола миэбэлэ, мала-сала барыта успуорт саалатыгар уурулунна — диэн ХИФУ ППОС бэрэссэдээтэлин бастакы солбуйааччы Максим Колесов кэпсиир.
Халаантан хаалбыт дириҥ чалбахтары сүүрүгүрдэргэ устудьуоннар үлэлииллэр.
—Маны сэргэ, нэһилиэнньэҕэ тиэргэннэрин, дьиэлэрин, оҥкучахтарын куурдарга көмөлөһөбүт. Бастатан туран соҕотох кырдьаҕастарга. Ону таһынан, спортивнай былаһаакка газонун өрө тардабыт, — диэн Максим Колесов эбэн этэр.
Санатан эттэххэ, от ыйын 15 күнүгэр Ил Дархан Айсен Николаев сорудаҕынан СӨ Ыччат дьыалаларыгар уонна социальнай коммуникацияларга министиэристибэнэн Суордаах нэһилиэгэр М.К.Аммосов аатынан ХИФУ бастакы сүһүөх идэлээх сойуустарыттан 10 устудьуон, Дулҕалаахха Координационнай сэбиэт уон устудьуона барбыттара. Байыастар Дьааҥы улууһун нэһилиэктэригэр ардах халаанын кэнниттэн олорор дьиэлэри уонна социальнай эбийиэктэри чөлүгэр түһэрэргэ көмөлөһөллөр.
Хаартыска устудьуоннар этэрээттэрин тиксэриилэрэ