Дьокуускайдааҕы тыа хаһаайыстыбатын техникумун салалта «Туймаада» экопиэрмэ» ХЭУо кытары 400 туонна оту бэлэмнииргэ дуогабар түһэристэ.
edersaas.ru
Инньэ гынан, техникум устудьуоннарын тутар этэрээтэ оттуу барда. Паромунан туттар тыраахтардарын, тэриллэрин, уматыктарын уонна астарын-үөллэрин арыыга таһаардылар.
Этэрээккэ производственнай үөрэхтээһин маастарын салалтатынан тыа хаһаайыстыбатын тиэхиньикэтин мэхээнньигин идэтигэр үөрэнэр Эрхан Винокуров, Василий Винокуров, Владимир Окороков, Максим Михайлов уонна Андриан Атастыров бааллар. Кинилэри кытары үүнүү хайдаҕын уонна оҕолор хайдах усулуобуйаҕа олорон үлэлииллэрин билсэр соруктаах техникум дириэктэрэ Андрей Самсонов барса сырытта.
– Үүнүү үчүгэй, үлэлииргэ сөптөөх усулуобуйа баар эбит, онон уолаттар оттуохтара, былааннарын толоруохтара, — диир кини.
Билигин устудьуоннар олохторун оҥостон, тиэхиньикэлэрин көрүнэн-истинэн бүттүлэр, онон аны охсууга туруннулар.
Раиса Сибирякова, «Саха сирэ» хаһыат, edersaas.ru