Маны аах Уопсастыба

Төрүччүнү көмпүүтэргэ таҥар устудьуон

Соторутааҕыта батсаапка сүрдээх тупсаҕай гына араас өҥүнэн араарыллыбыт төрүччү графикатын сөҕө көрбүтүм.

edersaas.ru

Ыйыталаһан билбитим, усту­дьуон уол үлэтэ эбит. Хаҥалас улууһун Күөрдэм нэһилиэгиттэн төрүттээх Гавриил Константинов Санкт-Петербурдааҕы технологическай институт 3-с кууруһугар менеджмент уонна маркетинг салаатыгар үөрэнэр. Төлөпүөнүн булан, батсаабынан суруйсан  кэпсэттим.

 

Иллэҥ кэммэр «веб-, ui/ux»-дизай­­нынан дьарыктанабын. Үөрэҕим да, сөбүлүүр дьарыгым да майгыннаһар буолан, бэйэ-бэ­йэлэрин ситэрэн биэрэллэр, — диэн эдэр киһи санаатын үллэстэр.

Гавриил «Сайдыы» диэн аат­таах Саха сириттэн сылдьар устудьуоннар түмсүүлэрин уопсастыбаннай тэрилтэтигэр баар эбит. Онно оҕолору кытта алтыһан, төрүччү туһунан билбит. Билигин устудьуоннар тэйиччиттэн олорон үөрэнэр буолан, эдэр киһи дьиэҕэ олорор эрэсиими тутуһар кэмигэр төрүччүнү оҥорорго ылсыбыт. Ол төрүөтүнэн, Дьокуускай куораттан эдьиийэ «төрүччүбүтүн көмпүүтэргэ таҥан кулу» диэн көрдөһүүтэ буолбут.

Эдьиийим миэхэ төрүч­чүбүтүн суругунан суруйан ыыппыта. Ону мин көмпүүтэр графикатыгар, «векторная иллюстрация» диэн анал бырагырааманан уруһуйдаан оҥорбутум. Бастаан макетын оҥорон баран, көлүөнэлэринэн араартыыбын. Ол, туһугар бэйэтэ интэриэһинэй үлэ. Сахалыы оһуору туттабын. Бу саҥа саҕалааһыным буолар. Наһаа сөбүлээтим. Төрүччүбүн оҥоро олорон, аймаҕым элбэҕиттэн соһуйбутум.  Бэйэ төрдүн билэргэ бу маннык көмпүүтэринэн таҥыы олус интэриэһинэй эбит. Киһи силиһин-мутугун олох кыра эрдэҕиттэн билиэхтээх. Онон бу маннык судургу төрүччү оҕону иитиигэ наһаа наада эбит. Хайа, уонна үйэлээх да буолар буоллаҕа.

Мин интэриэһим үгүс буолан, араас бырайыактарга кыттарбын сөбүлүүбүн. Худуоһунньук курдук уруһуйдаан буолбакка, үлэбин судургу гынабын. Аныгы үйэҕэ киһи барыта смартфоннаах, планшет­таах.  Оттон көмпүүтэр – веб-эйгэ.  Онон бу маннык өбүгэ маһа ыччат киһи төрүччүтүн билэригэр олус туһалаах, — диэн кэпсиир Гавриил Константинов.

Сатабыллаах ыччат көмпүүтэргэ таҥан, бэйэтин баҕатынан төрүччүнү оҥоро үөрэммитэ – хайҕаллаах суол. Онон билигин төрүччүбүтүн, өбүгэлэрбитин интэриэһиргиир кэммитигэр Гавриил Константинов бу дьоҕура дьоҥҥо олус туһалаах буолсу.

Елена ПОТОЦКАЯ, «Саха сирэ» хаһыат, edersaas.ru

3
0
Telegram @edersaas20

Добавить комментарий