Күүтүүлээх самаан сайын кэлиэҕиттэн, устудьуоннар сынньалаҥмыт саҕаланна. Сайыммытын туһалаахтык уонна умнуллубаттык атаарар туһунан бары да толкуйга сылдьабыт. Төрөөбүт дойдубутугар барыахпытын, аймахтарбытыгар атын улууска ыалдьыттыахпытын, сайыҥҥы тэрээһиннэри кэрийиэхпитин, муораҕа сөтүөлүөхпүтүн уонна да атын интэриэһинэй дьарыктары булунуохпутун сөп.
Сайыны уратытык хайдах атаарыахха сөбүй?
Волонтер. Бу үлэ устудьуоҥҥа бэйэтигэр да, атын дьоҥҥо да олус туһалаах буолар. Волонтерунан араас пуондаларга, балыыһаларга, оҕо дьиэлэригэр, үөрэх тэрилтэлэригэр, зоопаркаларга, түмэллэргэ, пааркаларга, лааҕырдарга үлэлиэххэ сөп. Бэл, кыраныысса таһыгар буолар тэрээһиннэр волонтерскай хамсааһыннарыгар кыттыһыахха сөп. Бу — ыччат ортотугар олус киэҥник тарҕаммыт дьарык көрүҥэ. Омук тылларын билэргэ, аргыс буоларга, араас дьону кытта билсэргэ сабыдыаллаах.
Сайыҥҥы үлэ. Үөрэх кэмигэр үлэлиир табыгаһа суох. Онон сайынын бэйэҕин араас идэҕэ холонуоххун сөп. Кафеларга официант, маҕаһыыннарга атыыһыт, үөрэнэр идэҕинэн үлэлээн уопутур.
Успуорт. Физическэй ноҕуруускаларга бириэмэтэ анааҥ. Успуорт, хамсаныы хас биирдии киһи олоҕор баар буолуохтаах. Дьиссипилиинэҕэ үөрэниҥ, доруобуйаҕытын тупсарыҥ, баҕар, үрдүк ситиһиилэри дабайыаххыт. Сайын пааркаларга, стадионнарга дьарыктанар олус туһалаах.
Хобби. Ыксаабакка саҥа хобби булунуоххун эбэтэр уруккугутун салгыаххын сөп: уруһуй, туой оҥоһук, иис, баайыы, ырыа, үҥкүү. Кинигэтэ ааҕыҥ, киинэтэ көрүҥ.
Туризм. Устудьуоннарга интэриэһинэй уонна кэрэхсэбиллээх хайысхаларынан буолуохтарын сөп: Иркутск, Йошкар-Ола, Краснодар, Алтай, Геленджик уо.д.а. куораттар. Сахабыт сиригэр эмиэ кыраһыабай сирдэр элбэхтэр. Саамай биллэр-көстөр сирдэринэн «Өлүөнэ очуостара», «Улуу Тоҕой», «Төхтүр», «Чочур Мыраан» буолаллар.