Саха сирин устудьуоннарын этэрээттэрин 2021 сыллаах үлэтин туһунан СӨ Бырабыыталыстыбатын бэрэссэдээтэлин э.т. Андрей Тарасенко мунньа ыытта.
Арассыыйа устудьуоннарын этэрээттэрин Саха сиринээҕи салаатын иһитиннэриитинэн, 2020 сылга тутууга, бырамыысыланнаска, доруобуйа харыстабылыгар, суол хаһаайыстыбатын үлэтигэр барыта 5 212 байыас үлэлээбит. Кинилэр сүнньүнэн национальнай бырайыактар уонна өрөспүүбүлүкэ оройуоннарыгар судаарыстыбаннай бырагыраамалар туолууларын чэрчилэринэн тутуллар эбийиэктэргэ көхтөөхтүк үлэлээбиттэр.
Маныаха 15 араас исписээлинэскэ уонна эбии үөрэхтээһиҥҥэ 437 байыас анал үөрэҕи ааспыт.
Араас тэрилтэлэри кытта бииргэ үлэлиир буолан, 2021 сылга устудьуоннар этэрээттэрин үлэлэрин хайысхата элбиирэ күүтүллэр. Маны сэргэ үлэни тэрийии систиэмэлэниэҕэ.
Устудьуоннар этэрээттэрин Саха сиринээҕи салаатын ыстаабын салайааччы Айсен Соловьев бэлиэтииринэн, үлэһиккэ наадыйыы этэрээттэр хаачыстыбалаахтык уонна түмүктээх үлэни көрдөрөллөрүгэр сабыдыаллыыр.
Оттон устудьуоннар этэрээттэрин кэлэр сыллааҕы үлэлэрин былаана бу сыл бүтүөр диэри бигэргэтиллиэҕэ.
Ил Дархан уонна Бырабыыталыстыба пресс-сулууспата.