Бүгүҥҥүттэн дьон өр күүппүт кафелара, эрэстэрээннэрэ аһыллан эрэллэр эрээри, бу тэрилтэлэртэн хааччахтааһын миэрэлэрэ олоччу уһуллубаттар.
Ол курдук, аһыыр сир 50% толору буолуо суохтаах, килийиэннэр олорор сирдэрэ бэйэ-бэйэлэриттэн кырата 2 миэтэрэ тэйиччи буолуохтаах. Биллэн турар, эрэстэрээннэргэ дьону түмэн үбүлүөй, уруу ыытар билигин даҕаны бобуллар.
Оттон успуорт комплекстара, эрчиллэр саалалар, фитнес кииннэрэ, хомойуох иһин, аһыллыбаттар. Кинилэр хайдах буолаллара атырдьах ыйын 14 күнүгэр биллиэҕэ. Өскөтүн хааччахтааһын миэрэлэрин устуу үһүс түһүмэҕэр киирдэхпитинэ, дьон эрчиллэр сирдэргэ сылдьыахтарын сөп буолуо. Киинэ тыйаатырдара эмиэ үһүс түһүмэхтэн тутулуктаналлар. Оттон саҥа түһүмэххэ киириини ыарыы тарҕаныытын коэффициена быһаарар. Бу сыыппара 0,5 тэҥнэстэҕинэ, хааччахтааһын миэрэлэрин устуу үһүс түһүмэҕэ көҥүллэниэн сөп буолар.
Егор Карпов, «Саха сирэ» хаһыат, edersaas.ru