Баһылай Манчаары аатынан успуорт национальнай көрүҥнэрин киинэ экспериментальнай былаһаакканан буолуоҕа.
Бу туһунан тустаах тэрилтэ пресс-киинэ иһитиннэрдэ. Ол курдук, Баһылай Манчаары аатынан успуорт национальнай көрүҥнэрин киинэ уонна Чурапчытааҕы физкултуура, успуорт института федеральнай экспериментальнай (инновационнай) былаһаакканы олоххо киллэрэргэ бииргэ үлэлииргэ сөбүлэһиигэ илии баттаатылар. Онон икки өттүттэн «Совершенствование системы подготовки спортивного резерва по национальным видам спорта в условиях Северо-востока Российской Федерации (на примере Республики Саха (Якутия)» тиэмэнэн бырайыакка үлэлиэхтэрэ.
Успуорт киинин дириэктэрэ Гаврил Мохначевскай аныгы тэрийэр-методическай ньымалары туһанан, успуорт национальнай көрүҥнэригэр дьарыктаныы тиһигин сайыннарыы былаһааккатынан буолуоҕун бэлиэтиир. Бииргэ үлэлээһиҥҥэ чинчийиилэр, мониториннар, уопуттар, экспериментальнай үлэлэр, тириэньэрдэр , исписэлиистэр, методистар квалификацияларын үрдэтэр куурустар ыытыллыахтарын туһунан этиллэр.
Онон өрөспүүбүлүкэҕэ успуорт национальнай көрүҥнэрин сайыннарыыга болҕомто күүһүрэр.
+1
+1
+1
+1
+1
+1
+1