Доруобуйа Сүрүн

Успуорт алта эбийиэгэ үлэҕэ киириэ

Өрөспүүбүлүкэҕэ быйыл успуорт алта бөдөҥ эбийиэгэ үлэҕэ киллэриллэрэ былааннанар.

Балар 2021 сыл бүтүөр диэри үлэҕэ киллэриллиэхтэрэ диэн СӨ физкултуураҕа уонна успуорка миниистирэ Иннокентий Григорьев СИА  иһитиннэрэр.
«Успуорт министиэристибэтэ 2021 сылга өрөспүүбүлүкэҕэ алта бөдөҥ эбийиэги үлэҕэ киллэрэри былаанныыр. СӨ инвестиционнай быраграаматынан Алдаҥҥа «Энергетик» СОК уларытан оҥоруу үлэтэ салҕанар. Горнай улууһугар Бэрдьигэстээххэ 1000 миэстэлээх стадион,  сыал ытарга дэгиттэр комплекстаах 50 миэстэлээх интэринээт, Үөһээ Бүлүү улууһугар Андреевскай сэлиэнньэтигэр спортивнай комплекс«, — диэтэ Иннокентий Григорьев. Миниистир этэринэн, өссө «Мин Сахам сирэ XXI үйэҕэ» өрөспүүбүлүкэтээҕи үтүө дьыала хамсааһынын чэрчитинэн, Хаҥалас улууһугар Покровскайга Л.Н.Спиридонов аатынан тустуу саалата, Өлүөхүмэҕэ Куду Күөлгэ култуурунай-спортивнай комплекс тутулла тураллар. Маны таһынан, өрөспүүбүлүкэ бөһүөлэктэригэр, сэлиэнньэлэригэр  ГТО нуоруматын туттарарга успуорт биэс былаһаакката баар буолуоҕа.
СӨ Ил Дархана Айсен Николаев  успуорт эбийиэктэрин тутуу уонна сайыннарыы өрөспүүбүлүкэ улахан ситиһиитэ буоларын бэлиэтиир. «Тус бэйэ уонна оҕолор доруобуйаларыгар харыстабыллаах сыһыан барыбытыгар баар көстүүнэн буолуохтаах.  Сахабыт сирин хас биирдии олохтооҕо чөл, чэгиэн олохтонорун туһугар, биһиги саҥа култуураны тутан таһаарыахтаахпыт«, — диэн эрэнэр Ил Дархан.
«Доруобуйа физкултууранан, сөптөөх хамсаныынан-имсэниинэн, успуордунан тиһиктээхтик дьарыктаныыттан быһаччы  тутулуктааҕын 2020 сыл өссө төгүл көрдөрдө.Саҥа усулуобуйаҕа успуорду сайыннарыы ордук суолталаах, буолан баран, 2021 сыл Саха сиригэр Чэбдигирии сылынан биллэриллибитэ«, — диир Иннокентий Григорьев.
Миниистир 2020 сылга өрөспүүбүлүкэҕэ 1869 успуорт тутуулара үлэлээбиттэрин, ол иһигэр балтараалыы тыһыынча миэстэлээх 23 стадион, 870-тан тахса успуорт саалалара, 52 сөтүөлүүр бассейн, 22 хайыһар баазата, сыалы ытыыга аналлаах 29 тутуу диэн бэлиэтиир.
Саха сиригэр кэнники 20 сылга успуорт 177 эбийиэгэ тутуллубут, өрөспүүбүлүкэ 190 тыһыынчаттан тахса олохтооҕо успуордунан тиһиктээхтик дьарыктанар буолбут.
0
0
Telegram Whatsapp