Саха сирин киин куоратыгар бэйдиэ сылдьар ыттар кыһалҕаларын таһынан, дьиэтэ-уота суох, ускул-тэскил сылдьар дьон боппуруоһа сытыытык турар. Хомойуох иһин, маннык сылдьар дьон ортотугар эдэрдэр эмиэ бааллар.
Бүгүн, муус устар 12 күнүгэр, «Тирэх» өрөспүүбүлүкэтээҕи биир кэлим социальнай киин иһинэн үлэлиир «Алмаз» кэмиэрчэскэйэ суох тэрилтэни уонна «Линия жизни” аһымал киин хайдах быһыылаахтык үлэлии-хамсыы олороллорун, Дьокуускай куорат Дууматын хамыыһыйата көрдө.
“Тирэх” социальнай тэрилтэ сэбиэдиссэйэ Елена Григорьева иһитиннэрбитинэн, кинилэргэ 30-89 cаастаах дьахталлар уонна 35-79 саастаах эр дьон киирэллэр эбит. Манна дьону күҥҥэ үстэ аһаталлар, доруобуйаларын көрөллөр-истэллэр. Ыарыһахтары инбэлииккэ таһаараллар уонна анал интэринээт дьиэлэргэ олохтуурга үлэлэһэллэр. “Тирэх” социальнай тэрилтэ уопсайа 80 миэстэлээх. Бу сыл устата уопсайа 261 киһи кэлэн эмтэммититтэн иккитэ ВИЧ ыарыһахтар, 36 киһи коронавирус хамсыгар хаптарбыт.
Өрөспүүбүүкэтээҕи килиниичэскэй балыыһа кылаабынай бырааһа, дьокутаат Николай Васильев бэлиэтээбитинэн, медвытрезвитель наада.
“Алмаз” уопсастыбаннай, социальнай көмүскэл тэрилтэтин салайааччыта Серафим Иванов иһитиннэрбитинэн, кинилэргэ үксүн хаайыыттан тахсыбыт, арыгыга ылларбыт дьон кэлэллэр эбит. Манна кинилэри сүөһү көрдөрөн, мас кэртэрэн үлэлэтэллэр. Ити кэннэ кинилэри куоракка үлэ миэстэтинэн хааччыйаллар. Серафим Иванов бэлиэтииринэн, сылга 50 кэриҥэ киһи кэлэн ааһар. Ити дьонтон 70-80% үчүгэй олоххо төннөллөр.
“Линия жизни» аһымал тэрилтэ салайааччыта Оксана Кондакова кэпсииринэн, кинилэр Дьокуускай араас оройуоннарынан сылдьан бэйдиэ сылдьар дьону сылаас аһынан босхо аһаталлар. Ону таһынан мэдиссиинэ өҥөтүнэн туһаналларыгар көмөлөһөллөр.
Бу социальнай тэрилтэлэр биир сүрүн улахан кыһалҕаларынан бэйэлэрэ бас билэр дьиэлэрэ-уоттара суоҕа буолар. Маны таһынан, социальнай көмө оҥоһуллан, ускул-тэскил сылдьар дьон эмтэммитин кэнниттэн, кинилэри ханна да таһаарар сирдэрэ суоҕа атахтыыр эбит.
Хамыыһыйа быһаарбытынан, дьокутааттар тус бэйэлэрэ бу тэрилтэлэри көрүөх-истиэх буоллулар.
Ульяна ЗАХАРОВА.