Боксаҕа маҥнайгы ыарахан ыйааһыҥҥа аан дойду муҥутуур чөмпүйүөнэ Александр Усик Украина премьер-миниистирэ Владимир Гройсман киниэхэ Украина Дьоруойун аатын иҥэрэр туһунан көҕүлээһинин истэн баран, былаастар мин кыахпын дарбаталлар диэтэ. Бу туһунан NEWSONE иһитиннэрдэ.
Гройсман этиитин тиэрдибиттэригэр, Усик “Мин бу туһунан тугу да билбэппин, аахпатаҕым. Онон туох да диэн этэр кыаҕым суох. Кырдьыгынан этэр буоллахха, былаастар мин кыахпын дарбаталлар”, — диэбит.
От ыйын 22 күнүгэр Москваҕа, “Олимпийскай” спорткомлекска буолбут аан дойдутааҕы боксаҕа суперсерия (WBSS) финалыгар Александр Усик Арассыыйа боксерун Мурат Гассиевы уон икки рауннаах киирсиигэ кыайан, WBC, Бокса аан дойдутааҕы федерациятын (IBF), Бокса аан дойдутааҕы тэрилтэтин (WBO) итиэннэ Бокса аан дойдутааҕы ассоциациятын (WBA) версияларынан маҥнайгы ыарахан ыйааһыҥҥа аан дойду чөмпүйүөнүн ааттарын ылла.
Бу киирсии кэнниттэн Владимир Гройсман дойду бэрэсидьиэнэ Петр Порошенкоҕа Усикка Украина Дьоруойун аатын иҥэрэргэ этии киллэриэм диэн иһитиннэрбитэ.
Роман ПОПОВ, «Саха сирэ» хаһыат, edersaas.ru
Хаартыска: Интэриниэттэн ылылынна.