Улуу Кыайыыга туһуламмыт биир интэриэһинэй тэрээһин Хаҥалас улууҺугар массыынанан айанныыр дьахталларга анаан тэрилиннэ. edersaas.ru
— “Эркээни” автоледи кулууп тэриллибитэ быйыл сэттис сыла. 2012 сыллаахха улууспутугар массыынанан айанныыр дьахталлар 1-кы өрөспүүбүлүкэтээҕи ыһыахтарын тэрийбиппит. Ол тэрээһиммит суолтата улаатан, аны улуустарынан ыытыллар ыһыахха кубулуйбута. Ол курдук, хаҥаластартан эстафетаны бүлүүлэр ылбыттара. Онтон тэрээһини Үөһээ Бүлүүгэ, Уус Алдаҥҥа, Мэҥэ Хаҥаласка авто-леди кулууптара тэрийэн ыыппыттара. Быйыл Чурапчыга ыһыахтаары бэлэмнэнэбит.
Ыам ыйын 8 күнүгэр Дьокуускай куораттааҕы “Авангард” автооскуола салалтата Өктөм нэһилиэгин олохтоох дьаһалтатын кытта сүбэлэһэн баран, Орто дойду туристическай комплекс сиригэр-уотугар массыынанан күрэхтэһиини ыытта. Тэрээһини улуустааҕы “Эркээни” автокулууп чилиэнэ Ньургуйаана Готовцева иилээтэ-саҕалаата.
Киин куораттан “Авангард” автооскуола таһаарбыт үс массыынатынан үстүү киһилээх биэс хамаанда кытынна. Ол аата, 15 суоппар дьахтар күрэхтэстэ. Автоледилар түөрт түһүмэххэ күөн көрүстүлэр: бэйэни билиһиннэрии, суол быраабылатын билии, массыынаны ыытыы, оһолго түбэспит киһиэхэ бастакы көмөнү оҥоруу.
Тыҥааһыннаах күрэхтэһиигэ бастакы миэстэни “Победа” хамаанда ылла. Суол быраабылатын билэригэр тэҥнээҕин булбатах Таттина Большакова “Авангард” автооскуолаҕа А 1 категорияҕа үөрэнэр бирииһинэн наҕараадаланна. Массыынаны сатабыллаахтык ыытыыга Лена Артемьева чаҕылхай көрдөрүүлэнэн автохолодильникка тигистэ. Оһолго түбэспит киһиэхэ бастакы көмөнү оҥорууга Дина Андреева бастыҥынан тахсан, авточехолунан наҕараадаланна, — диэн күрэхтэһии түмүгүн иһитиннэрдэ Хаҥалас улууһуттан СӨ Дьахталларын сойууһун чилиэнэ, “Эркээни” автокулууп салайааччыта Лидия Афанасьева.
Онон быйыл Чурапчыга ыытыллар “Айан хотун” уонна “Суперавто-леди” түһүмэхтэргэ кыттыахтаах улуустааҕы “Эркээни” автокулууп чилиэннэрин кытта бэйэлэрэ көҕүлээн күрэхтэһии тэрийэн, өктөмнөр “Победа” хамаандаларын “Суперавто-леди” түһүмэххэ кытыннарыахтара.
Елена ПОТОЦКАЯ, «Саха сирэ» хаһыат, https://edersaas.ru