Кулун тутар 28-29 күннэригэр “Уруукап чаҕыл сааскыта” өрөспүүбүлүкэтээҕи иккис көҥүл түһүлгэ түстэниэҕэ. Бастакы түһүлгэ былырыын саха норуодунай суруйааччыта, бэйиэт, прозаик, тылбаасчыт Семен Руфов төрөөбүтэ 90 сылыгар анаммыта. Быйылгы тэрээһин көр-күлүү көрүҥэр ананар.
edersaas.ru
“Уруукап чаҕыл сааскыта” сааскы түһүлгэни Үөһээ Бүлүү улууһун дьаһалтата, айылҕа харыстабылын иниспиэксийэтин улуустааҕы салаата, Тамалакаан нэһилиэгин дьаһалтата, Ольга Фёдорова аатынан Киин бибилэтиэкэ, СӨ норуодунай суруйааччыта Семён Титович Руфов уонна кини кэргэнэ Мария Спиридоновна Арбыкина ааттарын үйэтитэр пуонда тэрийэллэр.
Сүрүн тэрээһиннэр улуустааҕы Киин бибилэтиэкэҕэ саҕаланыахтара. “Үтүө хоһоон кырдьыбат, өспөт, уолбат…” диэн Семен Руфовка аналлаах кинигэ быыстапката, “Бичик” кинигэ кыһатын атыыта, сахалыы хаһыаттарга суруйтарыы тэриллиэхтэрэ. Кыттааччылар улуустааҕы Култуура киинигэр “Балык үөстээх, киһи үөннээх” көр-күлүү нүөмэрдэрин толоруохтара. “Саханы саха оҥорбут ытык ас – мунду” диэн мундуну астыырга, “Түөрт строка” хоһоон айыытыгар күрэхтэр буолуохтара. Бастакы күн артыыстар, көр-күлүү түһүлгэтин бастыҥнарын кэнсиэринэн түмүктэниэҕэ.
Иккис күн, кулун тутар 29 күнүгэр Тамалакаан нэһилиэгэр Бэс Тумуһах алааска “Улуу мунду” куйуур күрэҕэ саҕаланыаҕа. Бу азартаах күрэҕи сэргэ “Сындыыстыы бу киммит көтүтэр?” диэн хаарга оонньуу дьон болҕомтотун тардыаҕа.
Сыала-соруга
—Суруйааччы С.Т. Руфов сырдык мичээрдээх, олоҕу айхаллыыр, бэргэн, сытыы тыллаах, үрдүк иэйиилээх, Ийэ дойдуга, төрөөбүт тылга тапталы иитэр хоһооннорун, суруйууларын үөрэтии, чинчийии, ааҕааччы киэҥ араҥатыгар тарҕатыы.
— Саҥа сытыы, баай тыллаах-өстөөх талааннары арыйыы.
— Улуу Кыайыы 75 сылын бэлиэтиир тэрээһиҥҥэ кыттыһыы.
— Айылҕа уһуктуутун туойуу, алҕааһын.
— Төрүт дьарыгы сөргүтүү, кэлэр кэнчээри ыччакка тарҕатыы.
— Саха төрүт аһын киэҥ эйгэҕэ таһаарыы.
— Дьиэ кэргэҥҥэ, дьоҥҥо-сэргэҕэ аҕа аатын өрө тутуу.
— Чөл туруктаах олоҕу тутуһууну тарҕатыы.
Кыайыылаахтарга туоһу сурук, анал бириис туттарыллар.
Билсэр төлөпүөннэргит: 8(411)-33-4-12-28 – Киин бибилэтиэкэ; 8(411)-33-2-87-27– Тамалакаан нэhилиэгин дьаhалтата.
Надежда ЕГОРОВА, “Саха сирэ”, edersaas.ru