Саха норуодунай суруйааччыта, поэт, прозаик, тылбаасчыт Семен Руфов төрөөбүтэ 90 сылыгар аналлаах тэрээһиннэр салҕаналлар.
Кулун тутар 31—муус устар 1 күннэригэр Үөһээ Бүлүү улууһун Тамалакаан нэһилиэгэр «Уруукап чаҕыл сааскыта» улуустааҕы тэрээһин ыытыллыаҕа.
Кулун тутар 31 күнүгэр Үөһээ Бүлүү с. киин бибилэтиэкэҕэ, суруйааччылар сквердэригэр улуустааҕы тэрээһин үөрүүлээх быһыыга-майгыга аһыллыаҕа. Бу күн “Олоххо айхал” Семен Титович айымньыларынан хомуурунньук кинигэ сурэхтэниэҕэ. «Бичик» кинигэ кыһата атыы-быыстапканы тэрийиэҕэ.
“И вновь пробуждается поэзия во мне” сылын аайы ыытыллар улуустааҕы уус-уран ааҕыы күрэҕэ элбэх кыттааччылаах буолара күүтүллэр. Күрэс кыайыылаахтарыгар поэзия «Пегас» көһө сылдьар бэлиэтэ уонна грамоталар, сертификаттар туттарыллыахтара.
Муус устар 1 күнүгэр сарсыарда 11 чаастан Тыымпы алааска «Улуу мунду» куйуур күрэҕэ тэриллиэҕэ. Бу ааптар «Улуу мунду» айымньытыгар уонна Аҕа күнүгэр анаан ыытыллар улуустааҕы куйуур күрэҕин соругунан төрүт дьарыгы кэнчээри ыччакка тарҕатыы, саха төрүт аһын киэҥ эйгэҕэ таһаарыы, дьиэ кэргэҥҥэ, уопсастыбаҕа аҕа оруолун өрө тутуу буолаллар.
Күрэххэ аҕа, эһээ оскуолаҕа үөрэнэр уолунаан, сиэнинээн кыттар. Уопсай түмүгүнэн мотуордаах икки миэстэлээх ПВХ тыы уонна бириистэр оонньонуохтара. Ону таһынан мундуттан араас бүлүүдэлэри буһарыы күрэҕэ олус интэриэһинэй буолуоҕа. Ким баҕалаах хаарга куобахтаан, сүүрэн да ылыаҕа.
Ол кэнниттэн Тамалакааннааҕы Култуура киинигэр норуодунай суруйааччы «Дьээбэтинньик» кинигэтинэн «Балык үөстээх, киһи үөннээх» көр-күлүү куонкуруһа буолуоҕа. Биллэрин курдук, С.Руфов көр-күлүү нарын, сытыы тылын маастара. Куонкуруска кыттааччылар ааптар айымньытын чинчийэн, ааҕааччы киэҥ араҥатыгар тарҕатыахтара, саҥа сытыы тыллаах-өстөөх талааннар арыллыахтара. Айылҕа уһуктуутун туойуу-алҕааһын сэҥээриллиэҕэ.
Норуодунай суруйааччы көр-күлүү жанрыгар суруйбут айымнньыларынан сценкалар, монологтар, инценировкалар туруоруллуохтара.
Тута түөрт строкалаах хоһоон айыытыгар «Экспромт»” күрэҕи суруйааччылар дьүүллүөхтэрэ.
Сайаапкалары кулун тутар 29 күнүгэр диэри олохтоох дьаһалтаҕа 8-41133-286-27 нүөмэргэ биэрэҕит.
Надежда ЕГОРОВА, “Саха сирэ” хаһыат, edersaas.ru