Уруу да араастаах…
Олох-дьаһах

Уруу да араастаах…

Кыһыны атаарыы куорат бары уокуруктарыгар ыытыллан, биһиги, кырдьаҕастар син «күннээтибит». Пааркаҕа киирэн, кыһыҥҥы хаартан босхоломмут ыскамыайкаларга олорон эрэ дьону-сэргэни одууластыбыт. Ол олорон, хата өр көрбөтөх дьоммутун көрсөн, үөрүү-көтүү бөҕө буоллубут.

edersaas.ru

Көрсүһүү үөрүүтэ үчүгэй эрээри, биир билэр кырдьаҕаһым кэпсээнин истэн, сүрэҕим ытырбахтаата.

Кирэдьиит кыһалҕата кырдьаҕастары араас өттүттэн таарыйар эбит. Дьиҥэр, биэнсийэнэн эрэ айаҕын булунар кырдьаҕаска хайа баан кирэдьиит биэрэр үһү дии саныахха сөп. Дьэ, оннук буолбатах эбит.

Үөлээннээҕим Киргиэлэй улахан моһуокка ылларбыт. Өссө бу сайын үөрэх туттарса кэлбит сиэн уола көрдөспүтүгэр (атаҕар эрэ үҥпэтэх) кирэдьиит биэрэр кэпэрэтиипкэ тиийбит. Онуоха пааспарын эрэ көрөн баран, аҕыйах мүнүүтэ иһигэр 19 тыһыынчаны биэрэ охсубуттар.

Утаа уол син бэйэтэ төлөөн испит. Онтон ууга тааһы бырахпыттыы сүппүт. Үөлээннээҕим кыра да буоллар үлэлээх, онон сотору-сотору үлэтигэр эрийэн «иэскин төлөө» диэн иэс баайан барбыттар. Биллэн турар, биһиги киһибит бэйэтэ да кыра хамнаһыттан кыайан төлөөбөтөх. Ол аайы «пенян бачча эбилиннэ» дии-дии күн аайы кэриэтэ эрийэн ньиэрбэтин бүтэрбиттэр. Онтон бааннар иэһин төлөөбөтүн иһин «буруйдаан» суукка биэрбиттэр. Бириистэптэр биир-биэс тыла суох оҕонньор муҥнаах икки ыйдаах хамнаһын тутан ылбыттар.

Дьэ, онон урууну-аймаҕы аһынан, көмөлөһөр аатыран иэдээҥҥэ түбэспит үөлээннээхпитин олус аһынныбыт. Үтүөнү оҥоробун диэн, ыйдааҕы хамнастан ытыс соттон хаалыы манан дьыала буолбатах.

Итиниэхэ сыһыаннаах өссө да элбэх кэпсэтии таҕыста. Өссө биир оҕонньор эмиэ ырааҕынан аймаҕар поручитель» буолбут. Ол киһитэ эмиэ ууга тааһы бырахпыттыы сүппүт. «Буруй эрэ моттойоҕо» дииллэринии, «поручитель» буолбут муҥар ол харчыны төлүү сылдьар үһү.

Кирэдьиит ылан баран, кыайан төлөөбөт буолуу содула эн хармааҥҥар эрэ охсубат. Кылаабынайа, доруобуйаҕар осхор эбит. Күнү-түүнү, үлэ күнүн-өрөбүлү аахсыбакка, баан үлэһиттэрэ, бириистэптэр эрийэн суоһурҕаналларын хайа таас сүрэхтээх киһи тулуйуой? Устунан доруобуйаҥ айгыраан баран. Били истириэс диэн тыл кырдьык истириэстэтэр!

2
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

10 + восемнадцать =