РФ Уһук Илини уонна Арктиканы сайыннарыыга миниистирэ Алексей Чекунков Саха сиригэр оробуочай сырыытын кэмигэр «Саха сирэ» урутаан сайдыы территориятыгар сылдьан, үлэ бырайыактарын билистэ.
Урутаан сайдыы территориятыгар хабыллыахтарын иннинэ, манна үлэлиир урбаанньыттар дьоҕус тэрилтэлэрэ аччыгый инновационнай тэрилтэлэр ахсааннарыгар киирэллэрэ. Онтон бырайыакка киирэн баран, 2030 сылга диэри бу тэрилтэлэр оҥорон таһаарыы производствотын муҥутуурдук сайыннарыыга уонна саҥа аныгы технологиялары биир бастакынан олоххо киллэрэргэ дьулуһаллар.
Миниистир Алексей Чекунков «Саха Липснеле» ХЭУо өр кэмҥэ кытаанах оттугунан оттуллар хочуоллары оҥорон таһаарар үлэтин кытта сиһилии билистэ.
Резидент сыаҕа хочуол аҕыс көрүҥэ оҥоһуллар тимир лииһин оҥорон таһаарар. Бородууксуйа өрөспүүбүлүкэ тас өттүгэр тиийэ батарыллар буолла. Ол курдук, «Саха Липснеле» ХЭУо хочуоллара Санкт-Петербург, Новосибирска, Иркутскай уонна Улан-Удэ куораттарга тиийэ атыыга бараллар. Ааспыт сыл түмүгүнэн тэрилтэ өрөспүүбүлүкэ биэс оройуонугар 244 хочуолу туруорда. Бу үлэ нэһилиэнньэ ороскуотун субсидиялааһын өрөспүүбүлүкэтээҕи бырагырааматын чэрчитинэн ыытылынна.
Урутаан сайдыы территориятын резиденнэрэ саҥа технологиялары олоххо киллэрэн, 500 үлэ миэстэтин арыйдылар.
— Саамай кылаабынайа, бу бырайыактары олоххо киллэрэ сылдьар дьон сонун сүүрээни тобулууга толкуйдара кэскиллээҕэ кэрэхсэттэ. Онон маннык хайысхалаахтык үлэлиир тэрилтэлэр сайдыыларыгар кыахта биэриэххэ уонна кинилэри өйүөххэ наада, — диэн санаатын тиэртэ РФ Уһук Илини уонна Арктиканы сайыннарыыга миниистирэ Алексей Чекунков «Саха сирэ» урутаан сайдыы территориятыгар үлэлиир резиденнэр олоххо киллэрэр бырайыактарын кытта билсэн баран.
Елена ПОТОЦКАЯ, “Саха сирэ” хаһыат, edersaas.ru
Павел Иванов хаартыскаҕа түһэриитэ.