Урутаан сайдыы сирдэригэр 9,8 тыһыынча үлэ миэстэтэ былааннанар

Ааптар: 
Бөлөххө киир:

«Саха сирэ» уонна «Соҕурууҥҥу Саха сирэ» урутаан сайдыы сирдэригэр (ТОР) 9,8 тыһыынча үлэ миэстэтэ тэриллиэҕэ.

Итинник былаан баарын туһунан мунньахха этилиннэ. Манна даҕаттахха, ити сирдэргэ номнуо 6,6 тыһыынча киһи үлэлии сылдьарын Ил Дархан Айсен Николаев ТОР кэтээн көрөр сэбиэттэрин мунньаҕар эттэ диэн СӨ Ил Дархан уонна Бырабыыталыстыба пресс-сулууспата иһитиннэрэр.

Мунньахха ТОР сайдыытын динамикатын, инфраструктуратын, инвестицияны тардыы былаанын дьүүллэстилэр. Ил Дархан бэлиэтээбитинэн, «Саха сирэ» уонна «Соҕурууҥҥу Саха сирэ» («Саха сирин соҕуруу өттө») урутаан сайдыы сирдэригэр 38 резидент киирэр.  Этиллибитин курдук, хампаанньаларга күн бүгүн 6,6 тыһыынча киһи үлэлии сылдьар буоллаҕына, урутаан сайдыы сирдэрэ иккиэн 9,8 тыһыынча киһини үлэлэтэр былааннаахтар.

Дьокуускай куорат, Жатай, Мэҥэ Хаҥалас улуустарын сиригэр-уотугар баар, урут «Хаҥалас» («Кангалассы») диэнинэн биллэр, билигин «Саха сирэ» диэн ааттаах урутаан сайдыы сиригэр — кыраныыссаны кэҥэтэр уонна аатын уларытар туһунан бу сыл саҥатыгар быһаарыллыбыта. Ол чэрчитинэн, сайын манна «Хотугу мозаика» туристскай-рекреационнай кластер территорията (Табаҕа тумула) эбии киллэриллибитэ. Өссө манна «Полярная звезда» диэн сылы эргиччи үлэлиир оҕо лааҕыра тутуллар. «Саха сирэ» ТОР резиденин статуһа 22 тэрилтэҕэ бэриллибитэ, олор бэйэлэрин бырайыактарыгар номнуо 2,8 млрд солк. үбү  укпуттара уонна 250-тан тахса үлэ миэстэтин тэрийбиттэрэ. Оттон «Соҕуруу Саха сирэ» Нерюнгри оройуонугар баар. Манна 15 бырайыак олоххо киллэриллэр, сүрүн инвестор – «Колмар» хампаанньа.

Мунньах түмүгэр Айсен Николаев  бу икки ТОР сайдыытын динамиката үчүгэйин бэлиэтээтэ. Ол курдук, холобур, Сыырдаахха оҥорон таһаарар бородууксуйатын сылга 870 туоннаҕа тиэрдэр соруктаах сылы эргиччи үлэлиир «Саюри» тэпилииссэ үһүс уочаратын бастакы түһүмэҕэ үлэҕэ киллэриллибитэ. Итини таһынан, «Инаглинскайдааҕы» шахта бастакы уочарата уонна  сылга 6 мөлүйүөн туонна чоҕу хостуур кыамталаах «Инаглинскайдааҕы-2» хайаны байытар фабрика  үлэҕэ киирбиттэрэ.

Хартыскаҕа Андрей Сорокин (СИА)  түһэриитэ

+1
0
+1
0
+1
0
+1
0
+1
0
+1
0
+1
0