Бу күннэргэ, Кириэс Халдьаайы оскуолатыгар кэлиңңи кэмңэ умнулла быһыытыйбыт тэрээһини хос сөргүтэн, “Развитие профессиональной компетентности учителя по формированию функциональной грамотности учащихся как основа повышения качества образования” диэн тиэмэҕэ педагогическай ааҕыы ыытылынна.
Барыта уон биир учуутал кытынна. Дьүүллүүр сүбэҕэ биэс учуутал үлэлээтэ. Алын сүһүөх кылаас учууталлара “Формирование функциональной грамотности в условиях реализации обновленного ФГОС НОО” диэн дакылааттара кэрэхсэбиллээх.
Попова Т. М., Келина А. Н., Стручкова Е. Г. билиҥҥи ФГОС ирдэбилинэн оҕо ааҕар, суоттуур дьарыгын тосхолун түөрүҋэтин олоххо туһаныыны араас холобурга олоҕуран кэпсээтилэр.
Уруһуй учуутала А.Я. Тарабукина оҕо кылаас таһынан дьарыгар “Кумаакто” (Кумааҕыттан кырыйан таңан оңор) ааптар бэйэтин бырагырааматынан үлэтин саҕалаабыта сэттис сыла эбит. Сүрүннээн “Оригаминан” дьарыктаналлар, кумааҕы историятын үөрэтэллэр. Оңоруохтарын иннинэ, бастаан тиэмэни эрдэттэн ааҕан, үлэ ис хоһоонун ымпыгар-чымпыгар тиийэ ұөрэтэллэр. Оттон о5о элбэхтик илиитинэн оңорор, кырыйар буоллаҕына толкуйдуур дьоҕура, саңата сайдарын билэбит.
Местникова М. Н. бэтэринээр идэтин баһылыырга салайар “WorldSkills Russia” күрэхтэһиигэ юниордары бэлэмнээһин туһунан кэпсээтэ.
Тарабукин И. А. уолаттарга аналлаах “Эркээйи” бырайыагын сүрдээх өйдөнөр тылынан көмүскээтэ. Кини оҕолор ортолоругар туризмы сайыннарар соруктаах үлэтэ үгүс оҕону түмэр. Бу хайысхаҕа үлэ, биллэн турар, төрөөбүт сириң устуоруйатын. култууратын үйэтитииттэн саҕаланар.
Бравина Л. Н. “Исследовательская работа учащихся” физика, математика хайысхатыгар чиничйэр үлэлэриттэн санаа атастаста. Бу үлэ 2004 с Сыромятникова М. В. саҕалааһынынан олоххо киирбитин учууталлар Бравина Л.Н. уонна Попова А. И. тиһигин быспакка күн бүгүнүгэр диэри илдьэ сылдьаллар.
Николаева М.А. “Чтение в радость” бырайыагын сэргээтибит. Бу бырайыак орто кылаас оҕолороугар дьиэ кэргэнинэн ааҕыыны тэрийии бырайык билиңңи олоххо тыңаан турар кэмңэ тоҕоостоох.
Константинова Т.Н. “Деятельностный подход при подготовке юношей среднего звена к олипиаде по географии” бырайыага эмиэ сэңээриини ылла. Уолаттар 5- 8 кылаастарга онно-манна кыттыбат кэмнэрэ кэллэ. Оттон инникитин уол оҕо салайааччы, иитээччи, харыстааччы буола үүнэригэр маннык интеллектуальнай олимпиадалар олус наадалаахтар. Бу сүнньүнэн кэнники сылларга түөрт оҕо география салаалаах үөрэххэ киирэн үөрэнэ сылдьаллара хайҕаллаах.
Харайданова И. И. “Төрөппүт – оҕо – учуутал” дакылаатынан оҕону иитиигэ үөрэх, ааҕыы эйгэтигэр төрөппүт уонна учуутал бииргэ буолууларын оҕо сааһынан арааран этиитэ эмиэ уратылаах.
Сыромятникова Л. Р. химия уруоктарыгар “Формирование функциональной грамотности на уроках химии” дакылаатыгар уруок былаанын түөрүйэтиттэн саҕалаан, уруок тиэмэлэринэн оҕо ылыммыт үөрүйэҕин олоххо туттарын барытын холобурдаан көрдөрбүтэ болҕомтону тарта.
Түмүккэ бары үлэбитин туоһулуур кумааҕы тутан, миэстэлэспит учууталлар харчынан наҕараадаланан (урут хаһан да итинник суоҕа) уонна, биллэн турар, үс сыллаах хааччах кэнниттэн, дьэ, утарыта көрсөн олорон санаабытын сайа эттибит, салгыы үлэлииргэ баай уопуттан сомсон ыллыбыт. Санааттан санаа үөскээн, бары быстыспат ситиминэн иннибит диэки баран иһэргэ күүс-эрчим ыллыбыт.
Бириэмийэлэннилэр:
I миэстэ — Сыромятникова Л. Р, 5000 солк.
II миэстэ — Попова Т. Ю (алын сүһүөх оскуола), 3000 солк.
III миэстэ — Бравина ЛН, 2000 солк.
“Бүгүннү педагогическай ааҕыы сүрдээх тэрээһиннээхтик ааста. Хас биирдии методхолбоһуктан учууталлар кытыннылар. Олус интэриэһинэй ааҕыылары иһиттибит. Хас биирдии кыттааччы бэлэмнэммитэ өтө көстөр. Кыайыылаахтарга, кыттыбыт учууталлары эҕэрдэлиибит. Бу тэрээһини эрдэттэн сэрэтэн, бэлэмнээн, завучпутугар Аграфена Ивановна ыытта. Кини хас биирдии ыытар былааннаах улэтэ тып-тап курдук, чуолкай, өйдөнүмтүө”, — диэн дьүүллүүр сүбэ этиитинэн түмүктүүбүн.
Ирина Харайданова, Томпо, Кириэс Халдьаайы