Эҥин араас «кавалердар», дьэ, бааллар. Киһи да сонньуйар.
Дьокуускай куорат полициятын дьуһуурунай чааһыгар биир дьахтар эрийэн, кини кыбартыыратыттан тэлэбиисэр, монитор уонна ноутбук уорбуттарын туһунан иһитиннэрбит.
Бу уорууга уорбаланааччыны оперативниктар туппуттар — Амматтан төрүттээх 55 саастаах киһи.
Барыллаан быһаарыынан, бу киһи уонна дьахтар уруккута таптаһа сылдьыбыт дьон эбит. Ол кэмҥэ эр киһи дьахтарыгар баанын каартатын биэрэн, анараата тугу баҕарбытын атыылаһа, ылына сылдьыбыт. Кэлин арахсыбыттар.
Онтон балачча бириэмэ ааспытын кэнниттэн эр киһи дьахтарынаан көрсүөн баҕаран, киниэхэ дьиэтигэр тиийбитэ — дьахтара суох. Онуоха ааны тардыалаан көрбүтүгэр, күлүүһэ алдьанан, саарбахтык хатанар буолбут аан туох да эрэйэ суох аһыллан кэлбит.
Оччо аһыллыбыт аанынан иһирдьэ киирэн, бука, туох сөбүлээбитин ылар бырааптаах курдук сананан буолуо, эр киһи тэлэбиисэри, монитору уонна ноутбугу тутан тахсыбыт.
Уорбут тэлэбиисэрин атыылаабыт, онтон атынын дьахтарга төннөрбүт.
Бу чахчынан «уоруу» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.