Үгэс быһыытынан сыл ахсын ыытыллар Норуот маастарын күнүгэр анаммыт «Якутия мастеровая” диэн эрэгийиэннэр икки ардыларынааҕы быыстапка-дьаарбаҥка кулун тутар 2-6 күннэригэр Өксөкүлээх Өлөксөй аатынан култуура киинигэр ыытылла турар.
Манна Ненецкэй автономнай уокуруктан, Камчатскай кыраайтан, Бурятияттан тиийэ кэлэн улахан маастардар кытта сылдьаллар. Ону сэргэ, бэйэбит өрөспүүбүлүкэбит ыраах улуустарыттан үгүс маастар кэлэн кытта сылдьар. Мин болҕомтобун ыраахтан кылбачыйан көстөр таҥастар тартылар. Эдьигээн улууһуттан эдьиийдии-балыстыы Зоя Аполлонова уонна Евдокия Охлопкова миигин сэргэхтик көрүстүлэр. Мин ыраахтан көрөн кэлбит таҥастарбын үөһээттэн түһэрэн көрдөрдүлэр. Сыалыһар тириититтэн тигиллибит баартык, оҕо таҥаһа, ыстаан, куопта барыта сиигирбэт аналлаах эбиттэр.
— Биһиги Кыстатыам нэһилиэгиттэн төрүттээхпит эрээри билигин Эдьигээҥҥэ бэйэтигэр олоробут. Бу барыта бэйэбит тикпит таҥастарбытын, оҥоһуктарбытын аҕаллыбыт. Маннык таҥаһы балык ыраастыырга, балыктыырга кэтэргэ олус туһалаах, — диэн кэпсии-кэпсии Евдокия Тимофеевна сыалыһар тириититтэн суумкалары, ыстааннары, баартыктары, таба муоһуттан оҥоһуллубут оҕуруолары, араас киэргэллэри көрдөрдө. Балартан мин таба туйаҕын тыаһын санатар хас да туйахтан холбуу оҥоһуллубут тыастаах оонньууру сэргээтим.
Уруурҕуу көрдүм
Ненецкэй автономнай уокуруктан Кристина Тайбарей, Камчатскай кыраайтан кэлбит Лидия Аслапова төрүт өбүгэ таҥаһын тигэн быыстапкаҕа аҕалбыттара үгүс дьон болҕомтотун тарта. Араас оҕуруолаах киэргэллэрин, бэйэбит хоту улуустарбыт оҥоһуктарбытыгар маарынната көрдүм.
Ыраах сиртэн кэлбит ыалдьыттар оҥоһуктарын бэйэбит оҕолорбут, Дьокуускайдааҕы худуожественнай училище устудьуоннара билиһиннэрэ тураллар.
— Биһиги волонтердарбыт. Идэбитигэр сыһыаннаах буолан маннык быыстапкаларга өрүү көмөлөһөбүт, сэргиибит, — диэн Мичийээнэ Муксунова санаатын үллэһиннэ.
Ульяна ЗАХАРОВА.