Суолталаах Уопсастыба Успуорт

Уруй-айхал буоллун, спортсменнарга!

Бэҕэһээ, от  ыйын 9 күнүгэр, Уус Алдан Бороҕонугар биир нэдиэлэ ыытыллыбыт  Саха сирин норуоттарын спортивнай оонньуулара этэҥҥэ түмүктэннэ. Бары көрүҥҥэ кыайыылаахтар билиннилэр.  Уус Алдан олохтооҕо Полина Победа Артур Бурцевка, Танда волейболист кыргыттарыгар уонна Василий Румянцевка анаан хоһоонунан эҕэрдэтин тиэрдэр. 

 

 

АЙХАЛ БУОЛЛУН АРТУРГА!

 

Сатаммыт дуу, сатамматах
Куйаас күннэр сатыылаан
Сүүрүү буолар кэмигэр
Атахтаата Артуру.

Африка куйааһын
Билбэтэҕэ таайдаҕа,
Сытыы күммүт дьайыыта —
Көмүс мэтээл куоттаҕа!

Нөҥүө күнэ быһаарда
Кыайда саха ньоҕойо!
Бэйэтигэр анаммыт
Айаал ылла мэтээлин!

Икки омук булкуспут
Иллээх норуот туоһута!
Итии-тымныы алтыспыт
Тоҥмот-хаппат ыччата!

Айхал буоллун Артурга!
Уруй быһый Бурцевка!
Хайдах курдук көрдөрдө!
Ууга-уокка түһэрдэ!

Уус Алдаммыт оһуобай!
Дьикти дьоно дэлэгэй!
Хайа баҕар эйгэҕэ
Көстө-биллэ туруоҕа!

 

ТАНДИНКАЛАРГА
/Танда волейболист кыргыттарыгар/

 

Тамалҕаннаах талахтаах
Тандыгыбыт үрэҕэр
Турар Танда бөһүөлэк
Дьикти тыыннаах бөһүөлэк!

Ааспыт кэмтэн ордубут
Кэлин музей дэниллэр
Таҥаратын дьиэтэ дьэ
Арчылыыра буолуо дуу…

Улуус аҕыс дьоруойуттан
Үһэ Танда дьоруойа!
Үйэ аайы дьоруойдар
Үүммүт үтүө дойдута!

Онто эмиэ дьайдаҕа
Танда кэрэ кыргыттарын
Көрбүт эрэ барыта
Сөҕө көрдө кыахтарын!

Хайдах курдук кэрэтик
Волейболу баһылаан
Ааттаах-суоллаах хамаандалар
Хоттордулар хомойо.

Кыралара билбэтэ
Буораах тута билиннэ!
Ыһыы-хаһыы быыһыгар
Сытыы оонньуу оргуйда!

Кыра сымса кыргыттары
Сэргии көрө олорон
«Тандинкалар» диэн таптаан
Ботугуруу олордум.

 

ВАСИЛИЙ РУМЯНЦЕВКА

 

Тойота массыына
Мээнэнэн кэлбэтин
Билэбит, өйдүүбүт
Дьэ тэҥҥэ үөрсэбит.

Ол оҕо саастартан
Уһуйбут, такайбыт
Төрөппүт дьонноро
Ийэлээх аҕата.

Ситиһии кэллэҕэ
Көлөһүн ТИЛИННЭ!
Уйбааннаах Таанньаҕа
Улахан сыанабыл!

Дьулуурдаах, тулуурдаах
Васяҕа эҕэрдэ!
Дьоннорун, дойдутун
Ааттатта дьэ күүскэ!

Улахан успуорду
Эн өрө тутаҥҥын
Чыпчаалтан чыпчаалга
Айаннаа этэҥҥэ!

 

Полина-Победа
09.07.2022с.

0
0
Telegram @edersaas20