Бэһис төгүлүн ыытыллар норуоттар икки ардыларынааҕы АРТ олимпиадаҕа Саха сириттэн Чокурдаах оҕолоро (Аллайыаха оройуона) ситиһиилээхтик кыттыбыттар. Бу туһунан оҕолору уруһуйга уһуйар учуутал Любовь Шараборина санаатын үллэһиннэ:
— Бу олимпиадаҕа оҕолор ыраахтан олорон кытыннылар. Ол эрээри, тохсунньуга каникулга олорон күн ахсын оскуолаҕа кэлэн уруһуйдаабыттара. Манна 5-18 саастарыгар диэри кытталлар диэн усулуобуйаҕа баара. Ити кыттыы түмүгэр үс оҕобут миэстэлэспиттэрэ. Сосин Александр живопись күрэһигэр 2 миэстэ, Слепцова Юлия мэтириэт уруһуйдааһыныгар — 3 миэстэ уонна Эверствова Алина диэн былырыын оскуоланы бүтэрбит кыыспыт 1 миэстэҕэ мэтириэт уруһуйугар тигистилэр. Олимпиада тиэмэтэ — үгэс буолбут кыһыҥҥы бырааһынньыктар диэн этэ. Маннык хабааннаах араас куонкурус элбэх. Оҕолору сайыннарар туһуттан барытыгар көхтөөхтүк кыттан иһэр туһалаах дии саныыбын.
Ульяна Захарова.