Дьокуускайга СӨ үөрэххэ уонна наукаҕа министиэристибэтэ итиэннэ экологияҕа, туризмҥа уонна агротехнологическай үөрэххэ Киин тэрийиилэринэн «Урожай-2017» быыстапка-куонкурус тэрилиннэ.
Ленин болуоссатыгар тэрээһиҥҥэ кытта кэлбит өрөспүүбүлүкэ 30-тан тахса оскуолата (Үөһээ Бүлүү, Горнай, Нам, Мэҥэ-Хаҥалас, о.д.а. улуустартан) сарсыардаттан турар сирдэрин киэргэтэн, үлэлэрин-хамнастарын сиһилии кэпсиир стендэлэри тардан, хаартыскалары көрдөрүүгэ ууран дьону-сэргэни, оҕону-урууну ыраахтан угуйдулар. Маныаха оскуолалар учаастактарыгар үүннэрбит оҕуруоттарын астарын, эмтээх оттору, эриэккэс үүнээйилэри, сир аһын арааһыттан барыанньалаан дэлэччи аҕалбыттара куорат олохтоохторун улаханнык сэҥээртэ, сэргэхситтэ. Атыылаһааччы да дэлэй буолла. Онтон оҕо-аймах өттө быыстапкаҕа көрдөрө аҕалбыт тарбыйахтарын, кус оҕолорун, кууруссаларын тастарыттан арахпатылар, хаартыскаҕа түһэн күннээтилэр.
Тэрээһин түмүгүнэн отонноох үүнээйилэргэ, оҕуруот аһыгар уонна хортуоппуйга, экзотическай үүнээйилэргэ, ландшафтнай дизайҥҥа, флористическай көстүүмнэр дефилеларыгар, хаартыскаларга кыайыылаахтарынан тахсыбыттары эҕэрдэлиэхтэрэ, хайысхаларынан анал ааттар туттарыллыахтара.
Биһиги корр., «Саха сирэ» хаһыат, edersaas.ru
Ааптар хаартыскаҕа түһэриилэрэ.