Эбээн уонна эбэҥки тылларыгар «Урикит» диэн ааттаах бастакы остуол оонньуута оҥоһуллан, киэҥ эйгэҕэ тарҕанарга бэлэмнэнэ сылдьар.
Оонньуу ааптара Арассыыйа наукаларын академиятын тыл үөрэҕин институтут лингвиһа Карина Мищенкова буолар. Ойуутун-дьарҕатын аан дойду дизайнҥа Red Dot Design Award наҕараадалаах Олеся Стеценко таҥан оҥорбут.
edersaas.ru
Бу оонньуу Сибиир уонна Уһук Илин 12 эрэгийиэнигэр олорор эбээннэргэ уонна эбэҥкилэргэ анаан оҥоһуллубут. 600 кэмпилиэк оонньууну Саха сирин оскуолаларыгар, уһуйааннарыгар уонна бибилэтиэкэлэригэр тиксиэхтэрэ.
Оооньуу эбээннэр уонна эбэҥкилэр саҥарар диалектарын учуоттаан, тус-туспа оҥоһуллубуттар. Холобур, Саха сиригэр эбэҥки тылын Аллараа Алдаҥҥа тарҕаммыт диалегынан, эбээн тылын ламунхинскай, Аллараа Халымаҕа уонна Аллайыахаҕа тарҕаммыт диалектарынан оҥоһуллубут кэмпилиэктэр кэлиэхтэрэ.
“Урикит” төрүт тылын олох билбэт даҕаны оҕону оонньуу нөҥүө саҥарарга үөрэтэр сыаллаах. Остуол оонньуутун ис хоһооно эбээннэр уонна эбэҥкилэр төрүт үгэстэригэр олоҕуран оҥоһуллубут.
Хаартыскалар — Сахабэчээт саайтыттан.
Егор Карпов, «Саха сирэ» хаһыат, edersaas.ru