Сүрүн Уопсастыба

Урбаанньыттар саҥа ньымаҕа үөрэнэллэр

Биисинэс-инкубатордар бэрэстэбиитэллэригэр трениннэр ыытыллаллар. Ол курдук, өрөспүүбүлүкэ 11 улууһуттан биисинэс-бырайыагы кылгас болдьох иһигэр тэтимнээхтик сайыннарарга, бородууксуйаны ырыынакка батарыыга, тарҕатыыга саҥа ньымаҕа үөрэнэллэр.

Трениннэр кыттыылаахтара үлэҕэ үөрүйэхтэрин үллэстэллэр. Аллараа Бэстээххэ биисинэс-инкубаторга сылдьаллар уонна Ньурба, Нам, Амма, Уус Маайа оройуоннарын биисинэс-инкубатордарын бастыҥ быраактыкаларын презентацияларын билсэллэр. СӨ Урбаан, атыы-эргиэн уонна туризм миниистирин бастакы солбуйааччы Максим Карбушев биисинэс-инкубатордар ахсааннарынан Саха сирэ Арассыыйаҕа бастакы кэккэҕэ сылдьарын эттэ.

Санатан эттэххэ, Уһук Илин бастакы биисинэс-инкубатор 2006 сыллаахха Дьокуускайга аһыллыбыта. Билиҥҥи туругунан, федеральнай уонна өрөспүүбүлүкэ бүддьүөтүн суотугар  эрэгийиэҥҥэ уопсайа 17 биисинэс-инкубатор тэриллэн үлэлии турар. Балар өҥөлөрүнэн 400 курдук дьоҕус уонна орто урбаанынан дьарыктанааччылар уонна бэйэлэрэ дьарыктаахтар туһаналлар. Ааспыт сыл түмүгүнэн өрөспүүбүлүкэҕэ дьарыктаах дьон ахсаана элбээбитэ уонна дьоҕус биисинэһинэн дьарыктанааччы ахсаана элбээбитэ ыйыллар. Саха сиригэр 2021 сылга дьоҕус биисинэһинэн дьарыктанааччылар уопсай ахсааннара 22 бырыһыан үрдээбитэ бэлиэтэнэр. Оттон бүгүн өрөспүүбүлүкэҕэ тустаах министиэристибэ хайысхатынан “Центр мой бизнес” тиһиктээхтик үлэлиир.

0
0
Telegram @edersaas20