Биисинэс-кэмпириэнсийэни сыл ахсын тэрийэн ыытыахтара.
Хаҥалас оройуонугар Орто Дойдуга ааспыт өрөбүллэргэ өрөспүүбүлүкэҕэ биир бэлиэ суолталаах «Саха сирин практическай биисинэс-кэмпириэнсийэтэ» буолан ааста. Бу туһунан СӨ Предпринимательство, атыы-эргиэн, туризм министиэристибэтин саайтыгар сурулунна. Кэмпириэнсийэни СӨ атыы-эргиэн бырамыысыланнай палаататын өйөбүлүнэн Саха сирин бизнесменнэрин кулууба, «Арктика» (Орто Дойду) сабыылаах акционернай уопсастыба, «Фокус ПРО» консалтинговай киин тэрийэн ыыппыттар.
Тэрээһин түһүлгэтигэр өрөспүүбүлүкэ улуустарыттан 250-тан тахса урбаанньыт түмсүбүт. Норуоттар икки ардыларынааҕы консалтинговай хампаанньалартан, Арассыыйаттан биисинэс-тириэньэрдэр, Сколковаттан ыалдьыттар уонна Саха сиригэр ситиһиилээх үлэлээх урбаанньыттар, уопсайа 30 киһи мустубут дьон иннигэр тахсан сүбэ-ама биэрбиттэр, санааларын үллэстибиттэр, бэйэлэрин үлэлэрин-хамнастарын сырдаппыттар.
Маны сэргэ кинилэр биисинэскэ тирээн турар уонна сыаналаах, туһалаах тиэмэлэри ырыппыттара ыйыллар. Холобур, олоххо туһалаах, наадалаах хампаанньаны хайдах тэрийиэххэ, кэҥэтиэххэ. Сайдар кэскиллээх уонна сүүс сыл устатыгар бөҕөргөөн салгыы үлэлии турар дьиэ кэргэн биисинэһин хайдах тэрийиэххэ. Таһаарыылаах үлэлээх дьону хайдах үлэҕэ тардыахха. Итинтэн да атын кэпсэтии олус сэргэх буолбут, болҕомтону тардыбыт. Маныаха Саха сиригэр ситиһиилээх үлэлээх 25 урбаанньыт бэйэлэрин үлэлэриттэн туһалаах буолуон сөптөөх холобурдары аҕалбыттар.
—Ырыынак уларыйан иһэр. Олохтоох урбаанньыттар тахсан иһиэхтэрин сөп. Онно кинилэргэ билии-көрүү, үөрүйэх наада. Маныаха Арассыыйаттан ситиһиилээх урбаанньыттары ыҥыран сүбэлэттэрии, санаа үллэстиитэ маннык улахан тэрээһиҥҥэ туһалаах буолуоҕа.
Мин спикер быһыытынан кытынным. Онно кэпсэтиини ыытыттан саҕалаан, хардарыта сибээстээх үлэни, о.д.а. кэпсээтим. Салалта уонна биисинэс икки ардыларыгар кэпсэтии хаачыстыбата үлэни сайыннарыыга суолталаах.
Тэрээһин үрдүк таһымнаахтык ыытылынна. Бары кыттыбыт дьоҥҥо махтанабын, олус үчүгэй кэпсэтии таҕыста, — диэн СӨ Предпринимательство, атыы-эргиэн уонна туризм миниистирэ Тимур Ханды санаатын үллэстэр.
Тэрийээччилэргэ махтанааччы элбэҕэ ыйыллар. Секцияларынан үлэлэр тыырыллыбыттара олус табыгастаах буолбутун, наадалаах иһитиннэриилэри ылбыттарын бэлиэтээбиттэр. «Арктика» (Отро Дойду) хампаанньаны салайсар, биисинэс кэмпириэнсийэни тэрийсибит Марианна Андреева аныгыскы практическай биисинэс-кэмпириэнсийэ 2023 сылга атырдьах ыйын саҥатыгар ыытыллыаҕын туһунан иһитиннэрбит.
+1
+1
+1
+1
+1
+1
+1