Урбаанньыттар идэлээх бырааһынньыктарын уустук кэмҥэ бэлиэтииллэр
Бүгүҥҥү күҥҥэ өрөспүүбүлүкэҕэ дьоҕус уонна орто биисинэс салаатыгар 88 тыһыынча киһи үлэлиир. Урбаанньыттары идэлээх бырааһынньыктарынан СӨ урбаан, эргиэн уонна туризм миниистирэ Ирина Высоких эҕэрдэлээтэ.
edersaas.ru
— Эһиги бэйэҕит идэлээх бырааһынньыккытын сыстыганнаах дьаҥынан сибээстээн, олус уустук кэмҥэ бэлиэтиигит. Икки ыйтан ордук өрөспүүбүлүкэ урбаанньыттара үөрүйэх буолбут үлэҕитин үөскээбит балаһыанньанан араас сонун хайысхаҕа уларытарга күһэлиннигит. Бу маннык уустук кэми өйдөөн, өрөспүүбүлүкэ салалтата дойду үрдүнэн бары эрэгийиэннэртэн бастакынан биисинэһи өйүүр миэрэлэри ылыммыта. Бу былаас уорганнара биисинэс лиидэрдэрин кытта биир сүбэнэн үлэлииллэрин туоһутунан буолбута. Ол курдук, биисинэс бөдөҥ тэрилтэлэрин салайааччылара, урбаанньыттар уопсастыбаннай тэрилтэлэрэ үрдүкү салалтаҕа санааларын тиэрдэн, уопсай сүбэнэн кэккэ чэпчэтиилэри киллэттэрбиттэрэ. Бу уустук кэмҥэ урбаанньыттар эмчиттэргэ, ытык кырдьаҕастарга, элбэх оҕолоох дьоҥҥо өйөбүл буолаллар, көмөлөһөн илиилэрин утары уунаҕыт. Маннык саамай уустук кэмҥэ бары бииргэ дьоммутун-сэргэбитин кытта бииргэ буолан, көстөр ыарахаттары бары бииргэ туоратыаҕыҥ, — диэн бэлиэтээтэ бэйэтин эҕэрдэтигэр миниистир Ирина Высоких.
Үгүс урбаанньыт сыстыганнаах дьаҥынан сибээстээн, үлэтэ тохтоон хаалбытын учуоттаан, кинилэргэ сүбэ-ама буолар инниттэн тустаах министиэристибэ ыам ыйын 19 — 28 күннэригэр онлайн-эрэсииминэн араас сүбэлэри, уопуттаах бизнесменнэри кытта кэпсэтиилэри ыытар.
Өрөспүүбүлүкэбит социальнай-экэнэмиичэскэй сайдыытыгар дьоһун кылааттарын киллэрсэ сылдьар, ханнык да уустук кэмҥэ санааларын түһэрбэккэ дьулуурдаахтык иннилэрин хоту эрэллээхтик хардыылаан иһэр дьоммутун — урбаанньыттары идэлээх күҥҥүтүнэн истиҥник эҕэрдэлиибит! Санаабыккыт ыпсан истин, бары толкуйгутун ханнык уустук кэм тохтоппотун!
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА.