Сыстыганнаах ыарыы өрө туран, саамай уустук балаһыанньаҕа түбэспит салаанан дьоҕус уонна аччыгый биисинэс үлэһиттэрэ буолаллар.
edersaas.ru
Ыам ыйын 11 күнүгэр РФ бэрэсидьиэнэ Владимир Путин биисинэс эйгэтин өйүүр туһунан кэккэ миэрэлэри ыларга санаатын эттэ. Аҕа баһылык туруорбут соруктарын туһунан СӨ Урбааҥҥа уонна туризм дьыалатын миниистирэ Ирина Высоких санаатын маннык үллэһиннэ:
— Бэс ыйын 1 күнүттэн дьарыктаах буолууну өйүүр инниттэн анал кирэдьиит бырагырааматын үлэҕэ киллэрии саҕаланыаҕа. Бу өйөбүлүнэн уустук балаһыанньаҕа ылларбыт бары дьоҕус уонна аччыгый биисинэс тэрилтэлэрэ уонна социальнай хайысхалаах кэммиэрчэскэйэ суох тэрилтэлэр туһаныахтара. Саха сиригэр маннык өйөбүлү 5000 киһи ылыаҕа.
РФ бары субъектарыгар урбаанньыттары үбүнэн өйүүр судаарыстыбаннай тэрилтэлэр үлэлииллэр. Саха сиригэр оннук тэрилтэнэн СӨ урбаанын сайыннарыы пуондата буолар. Дойду аҕа баһылыга маннык тэрилтэлэри өйөөн, пуондаҕа баар харчы кээмэйин улаатыннарыахха наадатын ыйда. Ол хапытаал сойуом, иэс харчы быһыытынан урбаанньыттарга тиксиэҕэ. Онон урбаанньыты үбүнэн өйүүр пуондаҕа федеральнай бүддьүөттэн 12 миллиард солкуобай үбүлээһин көрүллүөҕэ. Ол эригиэйннэринэн үллэрии бэрээдэгэ чопчуланыаҕа. СӨ Урбааҥҥа уонна туризм дьыалатын министиэристибэтэ өрөспүүбүлүкэҕэ ирдэнэр кээмэйи — 300 мөлүйүөн солкуобайы сайаапка оҥорон бэлэмнээбитэ.
Саха сирин урбаанньыттарын өйүүр сыалтан кулун тутар 19 күнүгэр оперативнай бөлөҕү талбыппыт. Сыстыганнаах ыарыы өрө турбутунан сибээстээн, үлэлэрин тохтоторго күһэллибит урбаанньыттар сүбэлэһэн баран, ханнык өйөбүл миэрэлэри олоххо киллэриэххэ сөбүн ырытан, этии киллэрбиттэрэ. Ил Дархан Айсен Николаев кулун тутар 24 күнүгэр таһаарбыт дьоҕус уонна аччыгый биисинэһи өйүүр миэрэлэр тустарынан ыйааҕар урбаанньыттар киллэрбит 19 этиилэрэ барыта киирбитэ. Бу ыйыллыбыт миэрэлэринэн 17,9 тыһыынча урбаан эйгэтин тэрилтэтэ туһаныаҕа.
Cотору кэминэн дьиэҕэ олоруу эрэсиимэ тохтотулуннаҕына, РФ Бэрэсидьиэнэ Владимир Путин туруорбут соруктара олоххо киириэхтэрэ.
Елена ПОТОЦКАЯ, «Саха сирэ» хаһыат edersaas.ru
Хаартыска — Мария Васильева.