Урбаанньыт Петр Алексеев Бэс Күөлүн олохтоохторугар 1 мөлүйүөн солк. көмөлөстө

Горнай улууһун Бэс Күөлүгэр ойуур баһаара отучча чааһынай дьиэни былдьаан улахан алдьархайы таһаарда.

Дьиэтэ-уота суох турар бэйэлэринэн хаалбыттарга Саха сирин амарах санаалаах дьоно көмөлөһөн эрэллэр. Ол курдук, бүгүн Дьокуускай куоракка «Строй-град» маҕаһыыннаах, Уус Алдан улууһун Тумулуттан төрүттээх Петр Алексеев Бэс Күөлүгэр ойуур баһаарыттан дьиэтэ суох хаалбыт дьоҥҥо 1 мөл. солк. уу харчынан көмөлөстө. Горнай улууһун баһылыга Никита Андреевка туттарда.

Кини бүгүн оруобуна Бэс Күөлүгэр барар буолан, көмө харчыны нэһилиэк баһылыга Роман Федоровка туттарыаҕа. Ону нэһилиэк дьаһалтата баһаартан эмсэҕэлээбиттэргэ түҥэтиэҕэ. Никита Андреев амарах санаалаах урбаанньыкка ис сүрэҕиттэн махтанна.

Александр Тарасов, edersaas.ru