Мэҥэ Хаҥалас улууһун урбаанньыта Максим Забровскай бэйэ дьыалатын тэринэн, урбаанньыт буолбута уонтан тахса сыл буолла.
edersaas.ru
Билигин кини нэһилиэнньэни ыраас уунан хааччыйар «Чэгиэн» диэн бөдөҥ тэрилтэни салайар, эбии Эргиэн киинин үлэлэтэр. Тэрилтэтигэр уопсайа 35 үлэһиттээх. Ол онтон билигин сыстыганнаах дьаҥ өрө туран, отучча киһи үлэлиир. Урбаанньыт Майаҕа, Аллараа Бэстээххэ уонна Дьокуускай куоракка нэһилиэнньэни иһэр уунан хааччыйар пууннары үлэлэтэр.
— Урбаанньыт быһыытынан ханнык уустук балаһыанньаҕа түбэстиҥ? — диэн ыйытыыбар Максим Забровскай маннык хоруйдаата:
— Бүгүҥҥү күҥҥэ Эргиэн киинин урбаанньыттара үлэтэ суох олороллор. Кинилэргэ арендаларын төлөбүрүгэр 25% кыччаппытым. Оттон бэйэм өттүбүттэн, хомойуох иһин, ханнык да өйөбүлгэ хапсыбат эбиппин. Иһэр уунан хааччыйыынан дьарыктанааччылар коронавирус дьаҥынан сибээстээн уустук балаһыанньаҕа түбэспит урбаанньыттар ахсааннарыгар киирбэттэр эбит. Мин үлэлэтэр Эргиэн кииним үлэлээбэтэҕэ икки ыйтан орто. Онон биир дохуот киирэр салаабыттан эмиэ мэлийэн олоробун, — диир Максим Забровскай.
Бэйэтэ төһөтө да уустук балаһыанньаҕа түбэстэр, тыа сирин урбаанньыта коронавирус пандемиятынан сибээстээн улуустааҕы балыыһаны босхо ыраас иһэр уунан хааччыйбыта үһүс нэдиэлэтэ.
— Сыстыганнаах дьаҥ кэмигэр олус ноҕуруускалаахтык үлэлии сылдьар эмчиттэрбитигэр тугунан эрэ көмөлөстөрбүт диэн санааттан, кэллиэгэлэрбин кытта сүбэлэһэн баран, маннык өйөбүлү оҥорорго санаммыппыт,— диэн кэпсиир меценат-урбаанньыт.
Мэҥэ урбаанньыта Максим Забровскай түөрт сыл устата спорт хайысхатын өйөөн, улууска «Бастыҥ меценат» диэн номинацияҕа тиксэн турар.
Максим Заборовскай түөрт оҕолоох улахан дьиэ кэргэн аҕа баһылыга. Төһө да уустук балаһыанньаҕа үлэлээтэр, санаата бөҕөх. Кини үлэлиир хайысхатыгар да өйөбүл оҥорон, бэртэх хайыһалларыгар бигэтик эрэнэр. Иһэр уу — нэһилиэнньэ саамай тыын боппуруоһа буоллаҕа.
Елена ПОТОЦКАЯ, «Саха сирэ» хаһыат edersaas.ru