Саха сирин урбаанньыттара Айсен Николаев саҥа ыйааҕын өйөөн, эрэстэрээннэргэ, баардарга уонна да атын аһыыр сирдэргэ COVID — 19 утары «ыраас» зоналары тэрийэргэ сөбүлэстилэр.
Кинилэр этэллэринэн көҕүлээһин бизнеһи өйүүртэн саҕаламмыт, оннук зоналары арыйалларын-арыйбаттарын бэйэлэрэ быһаараллар диэн ыалдьыттары көрсүү ассоциацията иһитиннэрэр.
СӨ Ил Дарханын саҥа ыйааҕар уопсастыбаннай аһыыр сирдэргэ дьон коронавирус дьаҥыттан куттаммакка сылдьар сирдэригэр уларыйыан сөбүн туһунан этиллэр. Килийиэннэри QR-куодунан эбэтэр 72 чаас иһинэн оҥоһуллубут, коронавирус дьаҥынан ыалдьыбатах диэн ПЦР- тиэс түмүгүнэн киллэриэхтэрэ. Маннык хайысханан үлэлиир тэрилтэлэргэ хааччахтыыр миэрэлэр тутуһуллуохтара суохтара, талбыт миэстэҕэ олорон, төһө баҕарар киһи биир остуолга аһыан сынньаныан сөп, ону тэҥэ «ыраас» зоналаах аһыыр сирдэр бириэмэлэрэ хааччаҕа суох буолуо. «Ыраас» тэрилтэлэр предпринимательство министиэристибэтин анал реестригэр киллэриллиэхтэрэ.
«Маннык быһаарыныы дьоҥҥо хааччаҕа суох сынньанарга уонна ыарыыттан куттаммакка сылдьарга кыаҕы биэриэҕэ. Урбааҥҥа хааччахтааһын миэрэлэрин тутуһуу уустуктары аҕалар. Онон хааччаҕа суох үлэ урбааҥҥа барыһы киллэриэҕэ. Арассыыйа атын эрэгийиэннэриттэн ураты, урбаанньыттар интэриэстэрин уонна баҕаларын учуоттаан ыйаах бэлэмнэннэ. Урбаан министиэристибэтэ эрдэттэн биһиэхэ үлэ бэрээдэгин, бастакы докумуоннар тоҕоостоох формаларын бэлэмнээбитэ. Билигин коронавирус дьаҥыттан куттала суох үлэлииргэ сөбүлэһэрин эбэтэр билиҥҥи усулуобуйаҕа хааларын хас биирдии эрэстэрээн бэйэтэ быһаарыныаҕа», — диэн СӨ ыалдьытымсах буолуу ассоциациятын бэрэссэдээтэлэ Татьяна Тымырова бэлиэтээтэ.
«Ыраас» тэрилтэ статуһун ыларга бэлэмнэрин туһунан элбэх эрэстэрээннэр, караоке-саалалар, баардар, түүҥҥү кулууптар биллэрдилэр. Ол эрээри, бу тэрилтэлэр бэрэбиэркэттэн босхоломмоттор. Кэһиилэр баар буоллахтарына урбаанньыт административнай эппиэтинэскэ тардыллыаҕа уонна кини бу быраабыланан үлэлиирин бобуохтара.
Саҥа быраабыланан, хас биирдии сылдьааччыттан QR-куод ирдэниэҕэ. Ол көмөтүнэн «Госуслуги.Стопкоронавирус» портал нөҥүө килийиэн коронавирус утары быһыыны ылбытын бэрэбиэркэлиэхтэрэ. Ону тэҥэ кумааҕыга киһи коронавируһунан ыалдьыбакка сылдьарын бигэргэтэр ПЦР-тиэс түмүгүнэн киллэриэхтэрэ. Маныаха туоһулуур докумуоннары илдьэ сылдьар ирдэнэр. Маннык усулуобуйа тэрилтэ салалтатыттан, үлэһиттэриттэн эмиэ ирдэниэ.
Сокуоннай саастарын ситэ илик оҕолору коронавирус дьаҥа суоҕун бигэргэтэр ыспыраапкалаах эбэтэр быһыыны ылбытынан туһунан сэртипикээттээх эрэ киһи арыаллыыр кыахтаах. COVID-free зонатыгар киирэргэ хонтуруол пууннар олохтонуохтара. Саҥа быраабылаҕа кыттыан баҕалаахтар сайаапкаланыахтаахтар.
Бары ыйытыыларга СӨ Урбаан министиэристибэтин атыы-эргиэн, общественнай аһылык уонна конкуренция салаатыгар бу нүөмэрдэринэн билсиҥ: 50-65-81, 50-62-25; электроннай почта minpred.torg@mail.ru эбэтэр call_minpred@mail.ru.