Бүгүн СӨ Урбааҥҥа, эргиэҥҥэ уонна туризмҥа миниистирэ Ирина Высоких СӨ Бырабыыталыстыбатын официальнай ситимнэрин тэҥэ Instagram, ВКонтакте, Одноклассники уонна Facebook социальнай ситимнэринэн «быһа эпииргэ» кыттыыны ылла.
edersaas.ru
Миниистир урбаанньыттар үгүс ыйытыыларыгар хоруйдаата. Ордук элбэх ыйытыы сыстыганнаах дьаҥ турбут кэмигэр урбаанньыттар үөскээбит усулуобуйаҕа сыһыаннаах өйөбүлү хайдах туһаналларыгар киирдэ.
Элбэх урбаанньыт туризм сезона саҕаламмытынан, бу салааҕа туох өйөбүл көрүллэрин ыйытта. Холобура, туристическай тэриллэри атыылаһыыга 500 тыһ.солк. «Мин биисинэһим» кииҥҥэ сайаапка түһэрэн ылыаххытын сөп диэн сүбэлээтэ. Ону тэҥэ 3 мөл. солк диэри федеральнай өйөбүл эмиэ баар эбит. Бу өйөбүл туристическай бырайыагы сайыннарыы быһыытынан грант быһыытынан бэриллэр.
Дьиэҕэ олоруу эрэсииминэн сылтаан турбаазалар бары сабыллан туралларын, туроператордар үгүс харгыс үөскээбитин ыйан туран, сүбэ көрдөөтүлэр.
Онуоха миниистир «бу боппуруоска үрдүкү салалтаны кытта кэпсэтии, сүбэлэһии бара турар. Биллэн турар, сөптөөх быһаарыы уопсай балаһыанньаттан тутулуктаныаҕа» диэн эттэ.
Үгүс ыйытыыны бэйэ дьарыктаах дьон биэрдилэр. Социальнай урбаанньыт быһыытынан бэлиэтэниэн баҕалаахтар «тустаах болдьох ааһан эрэр, онон хайдах буолабыт» диэн туоһуластылар.
Урбаанньыттар үлэлэригэр сыһыаннаах боппуруостар хото киирдилэр. Холобура, маҕаһыыннарга килиэби туох да суута атыылыылларын сөбүлээбэттэрин биллэрдилэр. Дьон парикмахерскайдар хаһан үлэлиэхтэрин сөбүн ыйыттылар. Бары боппуруостарга Ирина Высоких толору хоруйу биэрдэ.
Елена ПОТОЦКАЯ, «Саха сирэ» хаһыат, edersaas.ru