Өрөбүлбүн төһө да харыһыйдарбын, “Бэс Чагда” оҕону сынньатар кииҥҥэ тиийэн, Ил Дархан харыйатыгар кэлбит оҕолору кытта көрсөн кэпсэттим. Итиэннэ дьиэбэр улаханнык сөҕөн-махтайан, кынаттанан, хата, барбытым да үчүгэй эбит диэн дьылҕабар махтанан кэллим.
edersaas.ru
Бииртэн биир талааннаах, дьоҕурдаах, бэйэ-бэйэлэригэр букатын маарынаспат ураты көрүүлээх, үөрэхтэригэр ситиһиилээх оҕолор мустубуттар. Олортон биирдэстэринэн, Ньурба улууһун Маар орто оскуолатын 11-с кылааһын үөрэнээччитэ Дьулустаан Павлов буолар. Омос көрдөххө, атыттартан туох да уратыта суох. Сэмэй, үөрэҕэр орто… Ол эрээри, кини чахчы ураты — фокуһунан үлүһүйэр.
Дьулустааннаах бииргэ төрөөбүт иккиэлэр. Ньургустаан диэн 9-с кылааска үөрэнэр бырааттаах. Ийэлэрэ Валентина Михайловна доруобуйатынан мөлтөх буолан, дьиэҕэ олорор.
2012 сыл талаанын арыйбыта
Дьулустаан фокуһунан 2012 сыллаахтан дьарыктанан саҕалаабыт. Биллэн туран, ылбычча буолбатах.
—Доҕотторум Стивен Фрейн-Динамо диэн киһи туһунан кэпсэтэллэрин истибитим. Кини эмиэ иллюзионист. Динамо туһунан киинэни көрдөөн булан көрөн баран, олус сөхпүтүм. Тоҕо эрэ тулалыыр дьонун үөрдэрин бэлиэтии көрбүтүм. Итиэннэ, кыратык дьарыктана түһээт, маҥнай ийэбэр уонна бырааппар көрдөрбүппүн улаханнык сөхпүттэрэ. Итинтэн кынат анньынан, мин эмиэ дьону сөхтөрүөхпүн, үөрдүөхпүн сөп эбит диэн санаа киирбитэ. Салгыы аттынааҕы ыалым оҕолоругар фокус көрдөрбүппүн улаханнык сэҥээрбиттэрэ. Онтон ыла күүскэ ылсан барбытым. Саҥа саҕалыыр киһи быһыытынан, маҥнай бытархай харчыны, быаны, испиискэни туһанарым, – диэн кэпсээнин саҕалыыр.
Хаартыга холонуу
Ахсыс кылааска үөрэнэр сылыттан хаартынан араас фокустары көрдөрөн саҕалаабыт. Хаартыга оонньуугун дуу, диэн ыйыппыппар: “Элбэх киһи инньэ диэн ыйытар. Хаартыны ити курдук хас тарбаҕыҥ аайы эргитэр киһи, оонньууга тута кыайар буоллаҕыҥ дииллэр эрээри, букатын сатаабаппын”. Мин фокустарбыттан дьон үөрэрин-көтөрүн көрөн улаханнык дьоллонобун, дуоһуйууну ылабын”, — диэн этэр.
Аан маҥнайгы фокуһуҥ туох этэй диэн ыйыппыппар, чочумча тохтуу түһэн баран: “Букатын кыра сылдьан эмиэ холонор эбиппин ээ”, — дии түһэр. Холобура, эрбэҕи ылан быраҕар эҥин курдук судургу ньымалары көрдөрөр эбит.
Дьулустаан, көрөөччү өрүү биир фокустан хал буоларын бэркэ билэр буолан, саҥаттан саҥаны толкуйдуур, атыттартан уратыны, сонуну буларга дьулуһарын этэр. “Үтүктээйи буолбатын туһугар, бүтэһик сылларга үксүн бэйэм айабын, сороҕор тупсаран, сайыннаран биэрэбин. Холобура, олоҕу кытта тэҥҥэ хаамсан, аныгы технологиялары — сотовай төлөпүөнү эҥин туһанан толкуйдаан таһаарбыт фокустардаахпын. Хас биирдии сыанаҕа тахсар киһи сатабылын сайыннаран иһиэхтээх, байытыахтаах”, — диэн санаатын үллэстэр. Хаартыны буккуйара табыллыбатаҕына үс-түөрт күнүн аҥаардас онно ыытар эбит. Оттон фокуһун көрдөрөрүгэр, көрөөччүгэ интэриэһинэй буоларын туһугар уһуннук бэлэмнэнэр, туораттан хайдах көстүөн барытын толкуйдаан, оҥорон көрөн, төбөтүгэр “буһаран” эрэр баран дьон дьүүлүгэр таһаарар эбит. Ити эйгэҕэ омуктартан Динамо, Дэвид Копперфильд, Гарри Гудини, сахалартан Алексей Гольдеров курдук талааннаах иллюзионистары, фокусниктары фанат оҥостор.
Кэпсэтиибит түмүгэр, Дьулустаантан саамай улахан баҕа санаатын ыйыппыппар: “Чугас дьонум, аймахтарым ыалдьыбакка этэҥҥэ сырытталлар”, — диэн хоруйдаата. Дьиҥэр, ити ыйытыыны “Айдарыылаах оҕо” бырайыакка суруйар хас биирдии оҕобуттан ыйытабын. Ол эрээри, үгүстэр тус бэйэлэрин баҕа санааларын этэллэр. Оттон Дьулустаан хоруйа миигин букатын сөхтөрдө.
Гран-при хаһаайына
Дьулустаан быйыл ыытыллыбыт “Битва фокусников” өрөспүүбүлүкэтээҕи куонкуруска Гран-при үрдүк аатын ылбыт. Иллэрээ сыл кыттан, иккис миэстэлэммит. Аҕыйах хонуктааҕыта “Саха” НКИХ “Күлүм түгэн” диэн биэриитигэр иллюзионист Алексей Гольдеровтыын кыттыбыттар. Биэриини тохсунньуга көрдөрүөхтээхтэр диэн эрэнэ кэтэһэр. Алексей Гольдеров фокустарын биһирии көрөрүн этэр. Биллэн турар, туттар тиэхиньикэбит атын-атын диэн этэр.
Дьулустаан иллэҥ кэмигэр фокустуурун таһынан, оскуола иһинэн Егор Петрович Мухин салайар “Уран” диэн тэхиньиичэскэй куруһуокка дьарыктанар. Туһаттан тахсыбыт малтан-салтан киһи өйүн үлэлэтэр, сайыннарар оонньуурдары, тэриллэри оҥорон таһаараллар. Кини онно дьарыктанан, “Пьяный велосипед” диэн бырайыак көмүскээн, өрөспүүбүлүкэҕэ бастаан, Санкт-Петербург, Москва курдук баай историялаах куораттарынан сынньанар путевканан наҕараадаламмыт.
Дьулустаантан биир эмэ фокуһу көрдөрөрүгэр көрдөспүппэр, сиэбиттэн холуода хаартыны таһааран буккуйбутунан барда. Букатын хас биирдии тарбаҕар эргитэн ылар. Киһи эрэ сөҕүөх! Миэхэ биир хаартыны талларда уонна онно тугу эмэ суруй диэтэ. Мин ааппын суруннум. Кини ылан иккитэ бүк тутта (ол тухары харахпын хаартыбыттан олох араарбаппын) итиэннэ тиискинэн ытыр диэтэ. Онтон бэйэтэ холуодаттан биир хаартыны ылан көрдөрдө, “Сосновый бор” диэн суруйда уонна эмиэ иккитэ бүк тутан баран тииһигэр ытырда. Үс-түөрт сөкүүндэнэн хаартытын арыйан көрдөрбүтэ – мин хаартым. Оттон кини хаартыта миэхэ баар буолан хаалла. Хайдах? Хаартыбын букатын ыһыктыбатаҕым эбээт! Биллэн турар, Дьулустаан хас биирдии уопуттаах фокусник курдук, кистэлэҥин арыйбата. Суруллубатах сокуоннара буоллаҕа, онон киһи өйдүүр.
Быраата Ньургустаан иллэҥ кэмигэр убайа фокустуур видеоларын устан интэриниэккэ таһаарар эбит. Сэҥээрбит дьон Дьулустаан инстаграмҥа julustan_p диэн страницатын арыйан көрүөххүтүн сөп.
Түмүк
Инники былаанын туһунан туоһуласпыппар: “Олус уустук ыйытыы. Билигин даҕаны толкуйдана сылдьабын. Бу дьарыкпынан баҕарар үөрэҕим суох эбит. Дьокуускайга Арктикатааҕы култуура уонна искусство институтугар туттарсыахпын санаталыыбын”, — диэн этэр.
Ити курдук, Дьулустаан бэйэтэ даҕаны билбэтинэн, айылҕа бэрсэн кэбиспит дьоҕура дьөлүтэ кэйиэлээн арыллан тахсан эрэр. Саха сиригэр кини курдук айылҕаттан бэрсибит талааннаах оҕолор аҕыйахтар эбээт. Үксүгэр, киһи баҕатын күүһүнэн дьарыктанан, туруулаһан туран сайыннарар. Оттон бэйэтэ тахсан кэлэрэ сэдэх. Дьулустаан үөрэнэн, ити талаанын салгыы сайыннардар бэрт этэ. Ону баара, Арассыыйаҕа иллюзионистары, фокусниктары бэлэмниир үөрэх суох эбит. Эгэ, Дьокуускайга кэлиэ дуо?! Ийэлэрэ инбэлиит буолан, кыһалҕаттан дьиэҕэ олорор. Ыраах үөрэттэрэ ыытар кыаҕа суох. Ол эрээри, оҕолорун туһугар олус кыһаллар. Оҕото талаанын салгыы сайыннарыан баҕарар. Дьулустаан, инниҥ диэки дьулус!
https://www.instagram.com/p/BcKSlDGhe5e/
Людмила ПОПОВА, “Саха сирэ” хаһыат, edersaas.ru
Хаартыскалар, видео Дьулустаан Павлов инстаграмҥа страницатыттан.