Маны аах Уопсастыба

Ураты күн 152 паара холбоһуоҕа

Саха сирин үрдүнэн олунньу 22 күнүгэр (22.02.2022) 152 саҥа ыал баар буолуоҕа. Ол иһигэр, Дьокуускайга 41 паара холбоһуоҕа.

Оннооҕор Тапталлаахтар күннэригэр Дьокуускайга баара-суоҕа 6 паара холбоспут. Бары ураты күнү күүппүттэр диэн ЗАГС управлениетын пресс-сулууспата иһитиннэрэр.

Дьиҥинэн, олоҕурбут үгэһинэн, ЗАГС-ҕа бээтинсэ, субуота күн саахсалыыллар. Ол эрээри, маннык кыраһыабай дааталарга холбоһуохтарын баҕарааччыларга утарбаппыт диэн ЗАГС управлениетын отделын салайааччы Римма Алексеева этэр.

Холобур, 2020 сыл олунньу 20 күнүгэр (20.02.2020) 145 паара холбоспута. 2018 сыл атырдьах ыйын 18 күнүгэр (18.08.2018) – 132 паара, 2021 сыл ахсынньы 21 күнүгэр (21.12.2021) – 34 паара саахсаламмыттар.

Бу маннык сиэркилэ курдук хатылаһар сыыппаралардаах ураты күн, этэргэ дылы, үйэҕэ биирдэ буолар. Онон, сибидиэтэлистибэҕэ эрэ кыраһыабайдык суруллар буолбатах, нумерология ыйарынан, сыыппара эдэр дьон олоҕор үтүө өттүнэн дьайар диэн итэҕэйэллэр.

2021 сылга Дьокуускайга 2 тыһыынчаттан тахса саҥа ыал баар буолбута. Кэрэхсэбиллээҕэ диэн, 2020 сылы кытары тэҥнээтэххэ, арахсыы ахсаана икки төгүл аҕыйаабыт.

Ангелина Васильева, “Саха сирэ” хаһыат, edersaas.ru

Хаартыска: ykt.ru

0
0
Telegram Whatsapp