Төрөөбүт төрүт тыл күнүн ылыы Мэлдьэхси орто оскуолатыгар сылын аайы ыытыллар үтүө үгэскэ кубулуйда. Оскуола үөрэнээччилэрэ, учууталлар бу күн сахалыы таҥнан кэлэллэр. Хайдах эрэ, тэрээһин ураты истиҥ тыынынан барар.
Сахалыы сиэринэн саламанан күрүөлэнэн, арыылаах алаадьынан, саламаатынан айах тутан, аал уоту күндүлээн, арчыланан, ыраастанан, билиҥҥи кэм ирдэбиллэрэ тутуһуллан, бастаан Сурук-бичик күнүн үөрүүлээх чааһа ыытыллар.
Бу күн Тыл бырааһынньыгынан истиҥ эҕэрдэтин оскуола дириэктэрин иитэр үлэҕэ солбуйааччы Юлия Петрова тиэртэ. Онтон оскуола библиотекара Александра Протопопова оҕолорго анаан интэриэһинэй викторинаны тэрийдэ. Итиэннэ, үөрэнээччилэргэ өбүгэ оонньууларын күрэхтэһиитэ ыытылынна.
Тыл күнүн тэрээһинин саха тылын учуутала Туйаара Игнатьева иилээтэ-саҕалаата. Төрөөбүт төрүт тылбыт күнүн бэлиэтээбиттэриттэн оҕолор астыннылар.
Надежда АНДРОСОВА,
Мэҥэ Хаҥалас улууһа.