«Уран тыал оһуора» түмсүү салайааччыта Раиса Тимофеева хоһооннорун билсиҥ

Биһиги бүгүн «Уран тыал оһуора»  түмсүү салайааччыта Раиса Николаевна Тимофеева-Михайлованы кытары айылҕа харыстабылыгар хайдах ылсыспытын кэпсэттибит.

edersaas.ru, Марта Николаева

Раиса бэйэтэ этэрин курдук, ураты айылҕалаах Хаҥалас улууһун Тиит Арыы нэһилиэгэр төрөөбүт. Кыра эрдэҕиттэн айылҕаҕа сүгүрүйэ, киэн тутта улааппыт. Ол иһин общественнай тэрилтэ тэрийээт да, айылҕаны көмүскүүр тэрилтэлэри кытары сибээстэһииттэн үлэтин саҕалаабыт. Кэнники сылларга Өлүөнэ очуостарын, айылҕа харыстабылын министиэристибэтин кытары ыкса  үлэлиир.

Раиса ааспыт сылга министиэристибэ ыыппыт хоһоону айааччылар күрэстэригэр  кыттан, кини айбыт ырыата бастакы миэстэни ылбыта. Элбэх айар дьоҕурдаахтары: хоһоонньуттары, баянистары түмэн айар умсулҕанынан дьарыктаналлар. Батсаап ситиминэн хоһооннорунан видео оҥорон тарҕаталлар. Хоһооннорунан Аар айылҕаны таптыырга, ытыктабыллаахтык сыһыаннарга ыҥыраллар. Раиса хоһонноругар айылҕа тематын дьүһүйүүгэ анаабытын билсиһиннэрэбит:

Көтүү

Түүл дуу, илэ дуу билбэппин
Кыракыйкаан кыысчааммын,
Өлүөнэ туруук хайа
Чыпчаалыгар дабайан,
Тахсаммын мин турабын.

Сарыыттан тигиллибит
Сэлиэкчиктээх,дьууппалаах
Кыра салыбырастаах,
Ойуу бичик оһуордаах,
Былыргы таҥастаахпын.

Баттахпын икки гына
Үчүгэйдик тараанан
Өрүнэн туттарбыппын.
Төбөбөр кыл сиэлинэн
Тымырдаайы кэппиппин.

Ырааҕы одуулааммын
Ийэ сирбин көрөбүн
Айылҕабын маныыбын,
Көтөр кынаахтары,
Кыыллары, балыктары.

Онтон дьэ тыын ыламмын
Түөспэр салгын иҥэрэн,
Илиилэрбин даллатан
Күүспэр күүс эбинэммин
Кыырайаммын көтөбүн.

Күн күлүмүн анныгар
Күөх дуолунан дайабын,
Сир халлаан ортотугар
Көҥүлүк кыырайабын,
Дойдубун харыстыыбын!

Айылҕаны харыстааҥ

Үрүҥ күнүм анныгар
Биэрэккэ мин турабын,
Ырааҕы одууламмын
Айылҕабын кэтиибин.

Ол тураммын иҥнэбин
Эбэ уҥуор биэрэгэр,
Тыа иһиттэн тахсаннар
Элбэх кыыллар мусталлар.

Уу таһыгар тураннар
Төбөлөрүн төҥкөтөн,
Ааттаһаллар көрдөһөн
Көмө көрдүүр курдуктар.

Ону сылыктаатахха
Айылҕа айгырыырын,
Кууран, хатан эрэрин
Этэллэрин иһиттим.

Элбэх маһы уоттааннар
Сир анна аһылларын,
Сир кырсын хайытаннар
Силиһин быспыттарын.

Саалаахтар баппаттарын
Эһэр санаалаахтарын,
Барытын кыдыйаннар
Тугу да тулуппаттар.

Олохтоох кыыллар бары
Күрэнэргэ тиийэллэр,
Ахсааннара аччааннар
Тулуурдара бүппүтүн.

Оччотугар сир дьонун
Харыстыыр кыахтара суох,
Күөхтүүр үүнээйи күүһүн
Тилиннэрэллэригэр.

Күн сирин бар дьонноро
Харыстааҥ дуу Айылҕаны,
Өрүстэри, күөллэри
Харыстыырга Турунуҥ!!!

Бырастыы гын Ийэ Айылҕа!

Бырастыы гын Ийэ Айылҕа
Сыллар тухары сириҥ ньуурун,
Бөҕүнэн-сыыһынан толорон
Киртитэн эрэйдээбиппитин.

Бырастыы гын Ийэ Айылҕа
Туох да көҥүлэ суох хаһаммыт,
Үлтүрүтэ дэлби эһэммит
Бааһырдан эрэйдээбиппитин.

Бырастыы гын Ийэ Айылҕа
Элбэх иэннээх сирдэри хабан,
Баһаарга уотунан салатан
Буһаран эрэйдээбиппитин.

Бырастыы гын Ийэ Айылҕа
Мууһу хайытан, үлтүрүтэн,
Уубутун даҕаны киртитэн
Сүһүрдэн эрэйдээбиппитин.

Бырастыы гын Ийэ Айылҕа
Көтөргүн,сүүрэргин эһэммит,
Кырыктаахтык кыдыйан бултаан
Ытатан эрэйдээбиппитин.

Бырастыы гын Ийэ Айылҕа
Сыыһа гыммыппытын өйдөөммүт,
Кэлэр сыллар тухары өрүү
Куруутун Харыстыыр буолуохпут !

Марта Николаева, edersaas.ru саайтка анаан