Саха сирин уран тарбахтаах иистэнньэҥнэрин, уустарын өрөспүүбүлүкэ таһымнаах «Якутия мастеровая» диэн тохсус төгүлүн ыытыллыбыт быыстапка-дьаарбаҥкалара түмүктэннэ. Далааһыннаах тэрээһин Сомоҕолоһуу сылын уонна СӨ норуот маастардарын күнүн чэрчитинэн ыытылынна. А.Е.Кулаковскай аатынан норуоттар доҕордоһууларын дьиэтигэр буолбут быыстапкаҕа 27 улуустан муһуннулар. Бу туһунан биһиэхэ норуоттар доҕордоһууларын дьиэтин пресс-сулууспатыттан иһитиннэрдилэр.
—Түһүлгэҕэ мастан, тимиртэн, муостан, туойтан киһи эрэ сөҕө-хайгыы көрөр оҥоһуктарын араастара, мааны бэйэлээх ювелирнай киэргэллэр, туос иһиттэр дьэрэкээннэрэ, кылтан-сиэлтэн бэргэһэлэр, сэлээппэлэр , бэртээхэй бэйэлээх оҥоһуктар, бэйэ оҥорбут куукулалара, национальнай көстүүмнэр, о.д.а. бар дьон көрүүтүгэр уурулуннулар. Быыстапкаҕа туруоруллубут үлэлэри Саха сирин биллэр-көстөр маастардара, искусствоведтар сыаналаатылар.
Үөрүүлээх түһүлгэҕэ национальнай көстүүмүнэн хаамыыга көхтөөх кыттыыны ылбыт Чурапчы (баһылык Андрей Ноговицын), Хаҥалас (баһылык Гаврил Алексеев), Алдан (Томмот куорат баһылыга Александр Заверюха) улуустара Ил Түмэн Махтал суругунан наҕараадаланнылар.
Норуот искусствотын, уус-уран оҥоһуктарын харыстааһыҥҥа, сайыннарыыга, норуот уус-уран оҥоһугун үрдүк таһымҥа таһаарыыга, тарҕатыыга, үйэтитиигэ сыралаах үлэлэрин сыаналаан, «СӨ норуот маастара» үрдүк ааты бу күн уран тарбахтаах иистэнньэҥнэр, уустар ааттаахтара: У.Е.Миронова (Мирнэй), Д.А.Артемьев (Амма), И.П.Колесов (Дьокуускай), В.Д.Федорова (Сунтаар), Х.З.Моякунова (Сунтаар) дохсун ытыс тыаһыгар доҕуһуоллатан туттулар. «СӨ норуот уус-уран оҥоһугун маастара» С.Е.Скрябина (Чурапчы), Т.Г.Аммосова (Горнай), Ф.Ф.Васильева (Үөһээ Бүлүү), А.И.Колесова (Дьокуускай), С.С.Петров (Хаҥалас), И.И.Окоемов (Уус Алдан), А.Л.Малышев (Хатас), У.М.Нохсорова (Дьокуускай), М.Н.Быканова (Усуйаана), И.К.Пахомова (Усуйаана) буоллулар.
Маны сэргэ, үөрүүлээх, далааһыннаах тэрээһин түмүгүнэн анал ааттар (номинациялар) туттарылыннылар.
Үлэлэри СӨ норуодунай худуоһунньуга, муос оҥоһуктар маастардара Марков Федор Иванович, РСФСР норуот үөрэҕириитин туйгуна, РФ култууратын үтүөлээх үлэһитэ, П.Ойуунускай аатынан Судаарыстыбаннай бириэмийэ лауреата, РФ уонна СӨ архитектордарын Сойууһун чилиэнэ, СӨ духуобунас Академиятын Академига Алексеев Эрнст Александрович, култуурунай нэһилиэстибэни чинчийиигэ уонна тарҕатыыга «Симэх» киин үлэһитэ, эспиэр Ермолаев Ариан Арианович көрдүлэр-иһиттилэр.
Муостан оҥоһуктарга I степеннээх лауреатынан Ньургун Наумов (Хаҥалас) , II ст.лауреатынан Константин Мамонтов (Дьокуускай), III ст.лауреатынан Леонид Соловьев (Дьокуускай) буоллулар.
Мастан оҥоһуктарга I ст. лауреат аатын Мичил Бурцев (Нам), II ст. — Павел Тимофеев (Бүлүү), III ст. — Владимир Егоров (Уус Алдан) туттулар.
Туойтан оҥоһуктары «Көмүлүөк маҕаһыын дириэктэрэ Ольга Григорьева, В.П.Ларионов аатынан институт наукаҕа сотруднига Василий Тагров, П.Романов аатынан художественнай училище преподавателэ Варвара Божедонова сыаналаатылар.
Бу хайысхаҕа I ст. лауреатынан Диана Крылова (Сунтаар), II ст. — Дмитрий Колодезников (Дьокуускай), III ст. — Ульяна Матвеева (Таатта) буоллулар.
Ювелирнай оҥоһуктарга уонна тимир уустарын үлэлэрин сыаналааһыҥҥа дьүүлүүр сүбэҕэ Николай Потапов — тимир ууһа, СӨ норуот маастара, П.Ойуунускай аатынан Судаарыстыбаннай бириэмийэ лауреата; Роман Готовцев — СӨ норуот маастара, хомуһу оҥорууга норуоттар икки ардыларынааҕы кылаастаах маастар; Виктор Игнатьев — «Симэх норуот уус-уран оҥоһуктарын национальнай киинин сүрүннүүр исписэлииһэ үлэлээтилэр.
Ювелирнай оҥоһуктарга I ст. лауреатынан Тамара Афанасьева (Сунтаар), II ст. лауреатынан Гаврил Николаев (Чурапчы) , III ст. лауреатынан Айсен Константинов (Сунтаар) буоллулар.
Тимир уустарыгар I ст. лауреатынан Александр Данилов (Хаҥалас), II ст. лауреатынан Таатта ууһа Сарыал Билюкин, III ст. лауреатынан Нам ууһа Ньургустаан Уваров буоллулар.
Туостан уонна кылтан-сиэлтэн оҥоһуктары СӨ култууратын үтүөлээх үлэһитэ, Чурапчы уонна Болугур нэһилиэгин бочуоттаах гражданина Валентина Пинигина, СӨ култууратын үтүөлээх үлэһитэ, кыраайы үөрэтээччи, СӨ «Уус» маастардар айар сойуустарын бэрэссэдээтэлин солбуйааччы Семен Телье-Иванов, туостан оҥоһуктарга СӨ норуот маастара Татьяна Карамзина сыаналаатылар.
Туостан оҥоһуктарга I ст. лауреат — Семен Черноградскай (Хаҥалас), II ст. — Парасковья Макарова (Таатта), III ст. — Тамара уонна Валентин Васильевтар (Нам) буоллулар.
Кылтан-сиэлтэн оҥоһуктар хайысхаларыгар I ст. лауреатынан Ольга Седалищева (Чурапчы), II ст. — Мария Петрова (Уус Алдан), III ст. Клеопатра Контогорова (Сунтаар) буоллулар.
Куукула арааһын оҥорон аҕалыыларын Саха сиригэр куукуланы оҥорооччулар түмсүүлэрин салайааччытын солбуйааччы Надежда Руфова, Дьокуускайдааҕы художественнай училищеттан декоративнай-прикладной искусство отделын сэбиэдиссэйэ Ньургустаана Филиппова, «Симэх» норуот искусствотын уонна уус-уран оҥоһугун киинин сүрүннүүр салаа исписэлииһэ Мирослава Шульговатая сыаналаатылар.
Манна I ст. лауреат аата Наталья Заболоцкаяҕа (Дьокуускай), II ст. — Любовь Кокшеневаҕа (Алдан), III ст. — Марина Сабирзяноваҕа (Нерюнгри) туттарылыннылар.
Национальнай көстүүмҥэ уонна тигиигэ үлэлэри Зинаида Понохова —СӨ норуот маастара, СӨ култуура туйгуна, РФ үөрэҕирии туйгуна; Татьяна Старостина — Ем.Ярославскай аатынан музей ст. научнай сотруднига; Лидия Будищева — художник-дизайнер, СӨ Бэрэсидьиэнин култуураҕа уонна искусствоҕа Гранын хаһаайына, СӨ култууратын туйгуна көрдүлэр, сыаналаатылар.
«Национальнай тигии» хайысхаҕа I ст. лауреатынан Венера Макарова (Өлүөхүмэ), II ст. — Александра Артемьева (Мэҥэ Хаҥалас), III ст. — Иван Окоемов (Уус Алдан) буоллулар.
«Национальнай көстүүмнэргэ» — I ст. лауреатынан Валентина Гаврилова (Алдан), II ст. — Алдана Егорова (Уус Алдан), III ст. — Варвара Федорова (Сунтаар) ыллылар. Бары хайысхаларга бастыҥ үлэлээхтэр Бочуотунай грамоталарынан наҕараадаланнылар. Маны сэргэ, тэрээһиҥҥэ көхтөөхтүк кыттыбыт дьоҥҥо Махтал суруктар, Бочуотунай грамоталар туттарылыннылар.
Тэрээһин чэрчитинэн, норуот маастардарын алтыс форума, национальнай көстүүмнээх парадка кыттыы (1200 киһи), хайысхаларынан маастар-кылаастар, төгүрүк остуоллар сэргэхтик ыытылыннылар, — диэн иһитиннэрдилэр.
Хаартыскалар: А.Е. Кулаковскай аатынан норуоттар доҕордоһууларын дьиэтэ