“Уран тарбах” ателье иистэнньэҥнэрэ Өлүөхүмэ обсерваторын үлэһиттэригэр көстүүмнэри тиктилэр

Өлүөхүмэ улууһун Токко сэлиэнньэтин “Уран тарбах” ателье (ИП Миронова Н.Н.) иистэнньэҥнэрэ улуус дьаһалтатын сакааһынан обсерватор үлэһиттэригэр элбэхтэ кэтиллэр көстүүмнэри тиктилэр.

edersaas.ru

Бу иннинэ бэтэринээрдэр управлениелара биирдэ кэтиллэр уонна чумааны утары (противочумнай) көстүүмнэри биэрбиттэрэ. Бу күннэргэ өссө 10 көстүүм кэлиэхтээх.

Маны тэҥэ, биирдэ кэтиллэр, ыарыыттан харыстыыр көстүүм тигиитигэр анаан 200 миэтэрэ матырыйаалы биэрбит  Наталья Валицкаяҕа (“Лада” маҕаһыын) махталбытын биллэрэбит. Көстүүмнэри тигэргэ көхтөөх уопсастыбанньыктарбыт — дьахталлар сэбиэттэрэ уонна педагогтар ыҥырыыны ылынан көмөлөстүлэр.

Коронавирус – биһиги уопсай “өстөөхпүт”. Бары туруннахпытына эрэ кыайар кыахтаахпыт. Ыарыыны аҕалбат уонна салгыы тарҕамматын туһугар дьиэҕэ олоруу саамай туһалаах, ирдэнэр миэрэ буолар! Дьиэҕитигэр олоруҥ!

Өлүөхүмэ улууһун дьаһалтатын пресс-киинэ.