«Уран Саха» ювелирнай фирма сүүрбэ сыл анараа өттүгэр үлэтин саҕалаабыт алтынньы 17 күнүн өбүгэ төрүт үгэһинэн бэлиэтээтэ.
Ол курдук, бу күн Дьокуускай куоракка «Арчы дьиэтигэр» алгыстаах оһуокай сарыала түһэрилиннэ, бар дьонугар оһуокай күрэҕин тэрийдэ.
Уйгулаах ыһыаҕы санатар кыһыҥҥы түһүлгэҕэ 50 этээччи кэлэн, оһуокайы оройуттан тутуста.
Суруналыыс, «Оһуокай» уопсастыба чилиэнэ, тэрийээччи, оһуокайдьыт Марта Николаева-Сарыалыйа сүргэтэ көтөҕүллэн туран маннык кэпсээтэ:
– Оһуокай күрэҕэ икки сааланан тэнийэн ыытылынна. Бу үтүө күнү уруйдуу кэлбит этээччилэр бары ис-истэриттэн арыллан, бииртэн биир хатыламат оһуокайы таһаардылар.
Сытыы киирсии түмүгүнэн бастакы миэстэни ураты дорҕоонноох куолаһынан, кылыһаҕынан, истиҥ иэйиилээх хоһуйуутунан Аар Дархан этээччи Анатолий Кривошапкин эрэллээхтик ылла. Иккискэ бары түһүмэҕи Сибиэрэптии тутан этэр Дархан этээччи Иван Васильев, үһүскэ кэрэ куоластаах Светлана Иванова таҕыстылар. Эдэрдэргэ Үөһээ Бүлүүттэн төрүттээх Ангелина Ксенофонтова тэҥнээҕин булбата.
Ону сэргэ, 92 саастаах Аар Дархан этээччи Егор Осипов, Дархан этээччи, аҕа саастаах алгысчыт Николай Тимофеев анал бириистэри туттулар. Кыайыылаахтар наҕараадаларын Лука Митрофанович ийэтэ, 92 саастаах Матрена Наумовна алгыстаах илиититтэн туттулар.
Оһуокай маннык күрэхтэригэр үксүгэр этээччилэр эрэ мустар буоллахтарына, бу сырыыга элбэх батыһааччы, кынат дьон кэллилэр. Онон «Уран Саха» оһуокайа хаһааҥҥытааҕар да өрө көтөҕүллүүлээхтик уонна уратытык ааста.
Лука Митрофанович аҕата Митрофан Егоров Аҕа дойду Улуу сэриитин кыттыылааҕа, дьонугар-сэргэтигэр үҥкүүһүт быһыытынан биллэр этэ. Лука Егоров ыһыахтарга, ол иһигэр Дьокуускайга ыытыллар сунтаардар ыһыахтарыгар, мэлдьи сыаналаах бириистэри туруорар, көмөлөһөр. Оһуокайы олус сэргиир, үчүгэй куоластаах, бастыҥ кыначчыт. Этэргэ дылы, сотору бэйэтэ да этэрэ буолуо диэн эрэнэ күүтэбит.
ххх
Бу күн «Арчы дьиэтигэр» кэлэн үбүлүөйдээх тэрээһиҥҥэ кыттыспыт дьон уйгулаах ыһыаҕы санатар оһуокайы тэрийэн ыыппыт «Уран Саха» ювелирнай фирма генеральнай дириэктэрэ Лука Егоровка, судаарыстыбаннай сулууспаҕа үрдүк таһымнаахтык үлэлээбит Антонина Степановаҕа, Лука Егоров бииргэ төрөөбүт балтыларыгар: фольклору үөрэтээччи, өрөспүүбүлүкэ бастыҥ тойуксута Лена Митрофановнаҕа, хаартыскаҕа түһэрээччи Варвара Митрофановнаҕа, эдэр тэрийээччи, устудьуон Мира Пермяковаҕа уонна Марта Николаеваҕа махтал бастыҥын анаан тарҕастылар.
– «Уран Саха» урааҥхайа улааттын, саргыта салалыннын. Түһүлгэҕэ хоһуйуллубутунуу, өр сылларга үрүҥ көмүстэн оҥоһуккут саха дьонун арчылаатын, үлэҕит таһаарыылаах буоллун. Уруй-айхал «Уран Сахаларга», – диэн этэр тыл эгэлгэтин анаатылар.
Надежда ЕГОРОВА, «Саха сирэ» хаһыат, edersaas.ru