Бүгүн биһиги уотунан барар массыына туһунан суруйуубутун салҕаан, сиһилии PHV систиэмэ туһунан кыратык кэпсиэхпит.
PHV (Plug-in Hybrid Vehicle) систиэмэ туох уратылааҕый?
Бастатан туран, боростуой гибриднэй систиэмэттэн сүрүн уратыта диэн, кини чааска муҥутаан 40-50 км эрэ барар буолбатах, төһө баҕарар түргэнник айанныыр кыахтаах. Ол аата, кини мотуорун боростуой розеткаттан ииттэн баран, хайдах баҕар ускуораһынан ханна баҕарар уотунан сылдьар кыахтаах. Ол гынан баран, уотунан сылдьарга батарыайаҥ бүттэҕинэ, төттөрү боростуой гибриднэй систиэмэҕэ көһөр, оттон боростуой гибриднэй систиэмэ, ааспыт ыстатыйаҕа эппитим курдук, кыра ускуораска эрэ үлэлиир. Ол иһин PHV систиэмэ диэн аҥаара уотунан барар массыына, аҥара – гибрид. Атыннык эттэххэ, олох уотунан эрэ барар массыына буолбатах. Холобур, Nissan Leaf курдук.
Бу PHV систиэмэ туох үчүгэйдээҕий диэн ыйытыыга эппиэттиэхпин баҕарабын. Үчүгэйэ диэн, киһи чугас сиргэ, куорат иһигэр, хас күн аайы гарааһыгар уокка ииттэрэн, уотунан эрэ сылдьар кыахтаах. Бэнсиини наһаа куттубакка, бараабакка. Онтукатынан олох үчүгэй уонна PHV систиэмэлээх буолан, холобур, Toyota Prius, эбэтэр Mitsubishi Outlander PHV сыаната мээнэ түспэт. Уонна эбэн эттэххэ, PHV систиэмэтэ суох да буоллаҕына, уотун иитиитэ бүтэн хааллаҕына, эппитим курдук, гибриднэй массыына буолан хаалар, боростуой Prius курдук.
EPOVER СИСТИЭМЭНЭН ҮЛЭЛИИР МАССЫЫНАЛАР
Аны туран, ол үрдүнэн аҥаара уот, эбэтэр барыта уотунан барар массыына ырыынагар күрэстэһии саҕаланан, Nissan бэйэтин PHV систиэмэни утары оҥоһуллубут инновационнай ePower систиэмэтин киллэрэн, билиҥҥи массыыналарыгар барыларыгар уган эрэр, ол курдук, Nissan Serena, Nissan Note. Ити ePower систиэмэ PHV курдук үлэлиир гынан баран, боростуой розеткаттан иитэр наадата суох курдук буолан тахсар. Ол аата, кини уотунан барар мотуорун бэйэтэ иитэн, гибрид курдук үлэлиир гынан баран, боростуой гибриднэй массыына инвектора уонна батарыайата эрэ буолбакка, бэйэтэ туспа уотунан барар мотуорун иитэн, киһи хайдах баҕар ускуораһынан, 40-50 км эрэ буолбакка, иитиитэ бүтүөр диэри сылдьыан сөп. Оттон иитиитэ бүттэҕинэ, кини бэйэтэ бэнсииниттэн, гибридиттэн үлэлээн, бэнсииниттэн барар мотуорун иитэн, кыратык бэнсиининэн сылдьан баран, кыратык толорон баран, уотугар көһөр. Ол аата, мин көрдөхпүнэ, PHV систиэмэттэн өссө үчүгэй курдук буолан тахсар уонна, үчүгэйэ диэн, уота бүтэн хааллаҕына, бэнсииҥҥэ көһөн хаалар. Онон Nissan Leaf уотунан эрэ барар массыынаттан өссө үчүгэй буолан тахсар. Тоҕо диэтэргин, Leaf-таах киһи уотунан эрэ сылдьар массыыналаах буоллаҕына, тохтоон хаалар. Холобур, биһиги Сахабыт сиригэр бэнсиин сапыраапката элбэх сиргэ баар, бэнсииннээх сиргэ тиийдиҥ даҕаны, тута айанныыр буоллаҕыҥ дии.
Mild Hybrid массыыналар
Бу уотунан барар массыыналар систиэмэлэрэ олус элбэх, ити өттүгэр улахан сайдыы бара турар. Дьоппуоннар итини бэйэлэрэ сэҥээрэн, астынан сайыннараллар, билигин ити боростуой гибрид, PHV, ол үрдүнэн ePower, ол онно өссө биир кэмҥэ Mild Hybrid систиэмэлэр бааллар уонна билигин бэнсиининэн барар Nissan-ҥа даҕаны кыра-кыра гибрид туруорар буолбуттар, толору гибрид курдук буолбакка, кыратык син биир уотунан көмөлөһүннэрэр. Уонна үп кэмчилэнэр, экология өттүнэн ыраас буолар, өссө систиэмэлэрэ сайда турар. Итиниэхэ мин санаабар, сотору өссө саҥа көрүҥ оҥоһуллубутун туһунан истэрбит буолуо. Холобура, бу адьас соторутааҕыта айыллыбыт саҥа Nissan Leaf биирдэ иитэн баран, 400-тэн тахса км айанныан сөп, ол биллэн турар, олус үчүгэй. Онон олох уотунан барар массыына дуу эбэтэр гибрид – аҥаара бэнсиин, аҥара уотунан барар үчүгэй дуу диэн киирсии буола турар. Ким кыайара биллибэт курдук. Холобур, мин көрдөхпүнэ, гибрид быдан үчүгэй курдук, тоҕо диэтэххэ, батарыайаҥ иитиитэ бүттэҕинэ, бэнсииҥҥэ көһөн хаалан баран салгыы айанныаххын сөп.
Водородунан барар массыыналар
Оттон олох саҥа оҥоһуу ханныгый диэн ыйыттаххытына, Toyota Mirai диэн массыына баар. Олох ураты, водородунан айанныыр, водород сапыраапката арыллан ахан эрэр, улахан куораттарга, дьоппуон дойдутугар барытыгар арылынна диэххэ сөп. Дьоннор этэллэринэн, кэлин водородунан эрэ барар массыыналар баар буолуохтара. Нуучча сиригэр, холобур, водород сапыраапката суох, ол иһин ити массыынаны ыллаххына даҕаны, сапыраапкалыыр кыаҕыҥ суох. Дьоппуоннар бэйэлэрэ син сэҥээрэн ылаллар, куоракка көрүөххэ сөп водородунан сылдьар массыыналары, Mirai диэн. Биллэрин курдук, Олимпиада чугаһаан эрэр, эһиил Токиоҕа буолар. Оонньууларга анаан-минээн водородунан барар оптуобустары бэлэмнии сылдьаллар, аныгы олох ураты тас көрүҥнээхтэр, хап-хара өҥнөөхтөр. Мин санаабар, күрэхтэһэ кэлбит спортсменнары, туристары, уопсайынан аан дойдуну барытын соһуталлара буолуо.
Бүгүҥҥү күҥҥэ Японияҕа водородунан да барар массыына баар, уотунан да барар массыына баар, аҥаара бэнсиин, аҥаара уот да массыына (гибрид) баар. Ол иһин билиҥҥи олоххо киһи итинник сайдыылаах систиэмэлэри туттан, көрөн-истэн, бииргэ баран иһиэххэ наада дии саныыбын.
Аны ураты үчүгэй массыына баар, аата Nissan ENV200 диэн. Бу массыына гибрид буолбатах, уотунан эрэ барар. Батарыайата толору буоллаҕына, 180 км курдук барар кыахтаах, саамай үчүгэйэ, кини кыра оптуобус курдук, Nissan Leaf курдук кыра буолбатах. Сээкэй угарга олус табыгастаах, киһи гарааһыгар уган баран ииттэрэ туруоран кэбиһэр түүн уонна бэнсиин куттара наадата суох курдук буолан тахсар.
Сэҥээрэр дьон баар буоллаҕына, баһаалыста, биһиэхэ кэлэн сүбэлэтэн, дьоппуон дойдутуттан аукционтан быһа бэйэҕитигэр массыына аҕалыаххытын сөп. Биһиги тэрилтэбит сапчаас атыылыыр икки улахан маҕаһыыннаах, ол үрдүнэн бэйэбит сервистээхпит, 10 подъемник киирэр, уонна ол үрдүнэн массыына киллэрэринэн дьарыктанабыт.
Гибрид массыынаны дьоппуон дойдутун аукционуттан сакаастыан баҕалаах дьон Instagram ситимигэр @autogroup_ykt диэн тэрилтэбитигэр кэлэн сүбэлэһэн баран, сакаас оҥоруохтарын сөп.
Ыйытыыларгытын эрэдээксийэ Instagram ситимигэр @edersaas.ru эбэтэр мин страницабар @smartcartrader суруйуҥ. Махтал!
Дмитрий Ефремов.
Токио (Япония).