Уот турар кутталлаах кэмэ саҕаланыаҕыттан, Саха сиригэр 560 ойуур баһаара бэлиэтэммит

Саха сиригэр бүгүҥҥү күн туругунан, 18  улууска  31 ойуур баһаарын утары үлэлэр ыытыллаллар.

edersaas.ru

Бу туһунан СИА иһитиннэрэр. Баһаардар уопсай иэннэрэ 2236,8 га. Бүгүҥҥү күн туругунан 9 баһаар тохтотуллубут. Ааспыт күҥҥэ уоту кытта охсуһааччылар 4 ойуур баһаарын бохсубуттар. Уоту утары охсуһууга 837 киһи, 76 анал тиэхиньикэ үлэлиир.

Суола-ииһэ суох уонна ыраах ойуур пуондатыгар 1356417 га иэннээх сиргэ 201 термотуочука бэлиэтэммит. Оттон уот турар кутталаах кэмэ саҕаланыаҕыттан, Саха сирин территориятыгар 1646605  га иэннээх сиргэ 560 ойуур баһаара бэлиэтэммит.

Баһаары утары охсуһарга көмөлөһө Арассыыйа ЫБММ Ил-76 сөмөлүөтүнэн Тюмень уобалаһыттан уонна Ханты-Мансийскай автономнай уокуруктан 90 анал бэлэмнээх парашютнай десант сулууспатын үлэһиттэрэ кэлбиттэр. Эбии Амур уонна Чита уобаластарыттан 95 баһаарынай кэлэрэ күүтүллэр.

Егор Карпов, «Саха сирэ» хаһыат, edersaas.ru