Саха сирин бырабыыталыстыбатын ураты суолталаах соругунан электрификация буолар.
Чугастааҕы сылларга уот линиятын Сунтаартан Ньурбаҕа тиэрдиэхтэрэ. Бу туһунан өрөспүүбүлүкэ баһылыга Айсен Николаев соцтиһиктэринэн быһа эфиригэр иһитиннэрдэ.
“Биһиги уот ситимин Сунтаартан Ньурбаҕа диэри тиэрдиэхтээхпит. Бу Ньурба, Үөһээ Бүлүү уонна Бүлүү оройуоннарын инники дьылҕалара. Сотору кэминэн сөптөөх быһаарыныыны ылыныахпыт”, — диэтэ Айсен Николаев.
Санаттахха, Илиҥҥи экэнэмиичэскэй форум-2018 кэмигэр Саха сирэ, “ДВЭУК” АУо уонна өрөспүүбүлүкэ сайдыытын корпорацията 2022 сылга диэри Бүлүү умнаһынааҕы улуустары уотунан хааччыйыы бырайыагын олоххо киллэриигэ бииргэ үлэлииргэ сөбүлэһии түһэрсибиттэрэ.
Ил Дархан гаастааһын боппуруоһун эмиэ тумнубата. Кини бу өрөспүүбүлүкэҕэ олус сыаналаах бырайыак буоларын бэлиэтээтэ. Билигин “Сахатранснефтегаз” гаастааһыны убатыллыбыт гааһы туһанан ыытарга этиитин көрөллөр.
СИА