Уоскуйарга эрдэ. Саха сирин баһылыга ойуур баһаардарын бохсууга эбии миэрэлэри ыларга соруйда

Атырдьах ыйын 21 күнүгэр өрөспүүбүлүкэ оройуоннарын дьаһалталарын салайааччыларын кытта видео-кэмпириэнсийэ көмөтүнэн ыытыллыбыт сүбэ мунньахха Саха сирин баһылыга Айсен Николаев хотугу улуустарга айылҕа баһаардарын умулларыыга бары кыахтары туһанарга эттэ.

“Өрөспүүбүлүкэҕэ ойуур баһаардарын иэнэ быдан аччаата. Илин эҥэр, соҕуруу, Бүлүү умнаһынааҕы улуустарга төһө да балаһыанньа көммүтүн үрдүнэн, хоту олус ыгым”, — диэн Ил Дархан сэрэттэ.

Айсен Николаев ойуур баһаардарын утары былаас федеральнай, өрөспүүбүлүкэ уонна муниципальнай уорганнарын күүстэрин түмэри ирдээтэ. Сүрүн соругунан хоту сытар Дьааҥы, Орто Халыма, Абый, Эдьигээн, Өлөөн оройуоннарыгар бары күүһү-кыаҕы быраҕыы буолар.

“Баһаары утары бөлөхтөрү күүһүрдүөххэ, ол иһигэр ирдэнэр буоллаҕына, федеральнай саппаас – “Авиалесоохрана” тэрилтэ эбии күүстэринэн. Маны сэргэ өрөспүүбүлүкэ авиатэрилтэлэригэр уот көрдүгэнэ баар сирдэригэр ойуур баһаарын умулларааччылары тиэрдиини хааччыйыахтаахтар. Бу соруктары чугастааҕы чааска олоххо киллэриэхтээххит. Уоскуйарга эрдэ. Хоту суоһаабыт куттал уҕарыы илик”, — диэн Саха сирин баһылыга бэлиэтээтэ.