Уоруулары арыйдылар: уорбаланааччылар — ыалдьыттар, ыаллара…

Ааптар: 
Бөлөххө киир:

«Бытархай» уоруулар куруук тахсаллар — хаһан баҕарар, ханна баҕарар, кимтэн баҕарар. Ону полиция оперативниктара арыйбыт уорууларыттан да көрүөҕүҥ. 

edersaas.ru

Ленскэй полициятыгар куорат эрэстэрээннэриттэн биирдэстэрин администратора эрийэн, уоруу тахсыбытын туһунан иһитиннэрбит.

Бу уорууга уорбаланан, урут сууттана сылдьыбыт 52 саастаах киһи тутуллубут.

Барыллаан быһаарыынан, бу киһи эрэстэрээҥҥэ үлэһиттэр сылдьар ааннарынан киирбит. Уонна дириэктэр кабинетыгар таҥастаах бакыат суумка баарын көрөн, тутан тахсыбыт.

Таһырдьа тахсан, суумка иһин аһан көрбүтэ — спортивнай көстүүм, атах таҥаһа уонна куурка сиэбигэр 8 тыһ. солк. баар эбит. Бу харчынан уорбаланааччы DVD-проигрыватель уонна арыгы ылыммыт. Уорбут малларын уонна харчы сороҕун булан былдьаабыттар.

Дьокуускай куорат полициятын 3 №-дээх отделын дьуһуурунай чааһыгар биир дьахтар эрийэн, 12 тыһ. солк. харчытын уордарбытын туһунан эппит.

Уорбаланааччы быһыытынан, ханна да үлэлээбэт, урут сууттана сылдьыбыт, дьахтар билэр 41 саастаах киһитэ тутуллубут.

Уоруу тахсар күнүгэр дьахтар дьиэтигэр хаһыа да буолан мустан, арыгы испиттэр. Дьахтар туохха эрэ аралдьыйбыт кэмигэр, уорбаланааччы кини суумкатын хасыһан, кумааһынньык булбут уонна онтон 12 тыһ. солк. харчыны ороон, уктан кэбиспит.

Харчытын уордарбытын дьахтар сарсыныгар эрэ өйдөөн көрөн, полицияҕа тыллаабыт.

Маны таһынан, суһал-ирдиир тэрээһиннэр кэмигэр бу киһи өссө икки уорууга сыһыаннааҕа биллибит. Икки түбэлтэҕэ иккиэннэригэр эмиэ ыалга ыалдьыттыы, арыгы иһэ сылдьан уорбут. Уорбут харчытынан арыгы атыылаһан иһэр эбит.

Эмиэ Дьокуускай полициятын 1 №-дээх отделыгар 12.500 солк. сыаналаах саҕынньаҕын уордарбыт дьахтартан сайабылыанньа киирбит. Полиицяҕа быһаарбытынан, кини биир кыбартыыраҕа хос куортамныыр, аттынааҕы хосторго атыттар эмиэ куортамнаан олороллор эбит.

Холуобунай ирдэбил оперативниктара бу уорууга уорбалаан, дьахтар 22 саастаах билэр кыыһын — аттынааҕы хоско ыаллыы олорор кыыһы туппуттар.

Барыллаан быһаарыынан, бу кыыс билэр дьахтартан кыбартыыра күлүүһүн ылан, эбиэтии кэлбит. Көрүдүөргэ турар ыскаапка саҕынньах ыйанан турарын көрөн, уорарга санаммыт.

Саҕынньаҕы суумкаҕа уган баран, туох да буолбатаҕын курдук, кыбартыыра күлүүһүн билэр дьахтарыгар биэрбит. Оттон уорбут саҕынньаҕын ломбарга 8 тыһ. солк. сыанаҕа туттаран, ол харчытынан бэйэтигэр оун-маны ылыммыт.

Бу чахчыларынан «Уоруу» ыстатыйанан холуобунай дьыалалар тэриллибиттэрин туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0