Уоруулары арыйдылар: төлөпүөнү, ноутбугу, 20 киилэ убаһа этин...
Бэрээдэк - Олох-дьаһах

Уоруулары арыйдылар: төлөпүөнү, ноутбугу, 20 киилэ убаһа этин

Ымсыы санаалаах биитэр «бытыга умайбыт» киһи туохтан да иҥнибэккэ уорар буолар эбит. Ону полиция оперативниктара арыйбыт уорууларыттан көрүөҕүҥ.

edersaas.ru

Нерюнгрига биир киһиттэн 56 890 солк. сыаналаах смартфонун уорбуттар. Уорбаланааччы быһыытынан, ханна да үлэлээбэт 35 саастаах киһи тутуллубут.

Барыллаан быһаарыынан, бу киһи поликлиникаҕа көрүдүөргэ олорон, биир кабинет аттыгар ким эрэ куурката сытарын өйдөөн көрбүт. Ким да кинини болҕойон көрбөтүнэн туһанан, ол куурка сиэбиттэн суотабай төлөпүөнү сойбоппут.

Ол эрээри, ыарахан сыаналаах төлөпүөнү сатаан «разблокировкалаабакка», кыайан атыылаабатах. Уорбаланааччы бэйэтэ быһаарбытынан, төлөпүөнү, харчыга наадыйан, уорбут.

Бу дьыала силиэстийэлэнэн бүтэн, суут көрүүтүгэр барбыт.

Ньурбаҕа 31 саастаах киһини тэрилтэ дьиэтиттэн сейфэни уонна ноутбугу уорууга уорбалаан туттулар. Уопсайа 25 тыһ. солк. кэриҥэ суумалаах хоромньу тахсыбыт.

Барыллаан быһаарыынан, бу урут сууттана сылдьыбыт киһи ити тэрилтэҕэ үлэлиир билэр киһитигэр хам-түм көмөлөһө сылдьыбыт эбит. Биир күн доҕотторун кытта аһаан-сиэн баран, арыгылара бүппүтүгэр, харчылара тиийбэтин иһин, ол билэр киһитин үлэтигэр барарга быһаарыммыт.

Үлэһиттэр күлүүс тылын ханна кистии ууралларын бэркэ диэн билэр буолан, туох да эрэйэ суох киирэн, дьоҕус сейфэни уонна ноутбугу кыбынан тахсыбыт. Уонна ноутбугу ыала киһиэхэ 5 тыһ. солк. батарбыт. Оттон сейфэни алдьатан, иһигэр туох баарын ылан баран, быраҕан кэбиспит.

Бу чахчынан холуобунай дьыала тэриллибит.

Мэҥэ Хаҥалас полициятыгар Аллараа Бэстээх 29 саастаах олохтооҕо сайабылыанньа суруйбут. Кини даачатыттан 20 киилэ убаһатын этин уорбуттарын туһунан. 7 тыһ. солк. суумалаах хоромньу тахсыбыт.

Уорбаланааччы тутуллубут — урут уорууга түбэһэн сууттана сылдьыбыт 37 саастаах киһи эбит.

Бу киһи итирэн баран, иччитэх турар дьиэ аттынан ааһан иһэн, уорарга санаммыт. Онуоха дьиэ күүлэтин ыйанан турар күлүүһүн алдьатан киирэн, 20 киилэ убаһа этин уоран тахсыбыт.

Полицейскайдарга «бэйэм сиэри уорбутум» диэбит. Уорбутута барыта былдьаммыт.

Бу чахчынан бэрэбиэркэ барар.

Бу туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

восемь − шесть =