Ленскэй куоракка 65 саастаах дьахтартан уопсайа 55.600 солк. сыаналаах кыһыл көмүс киэргэллэрин уорбуттар. Сүтүгүн түөрт ый буолан баран биирдэ өйдөөн көрөн, «бабат» диэбит.
Дьиэтигэр уоруу тахсыбытын туһунан тута полицияҕа тыллаабыт. Оперативниктар суһал-ирдиир тэрээһиннэр кэмигэр уорууга уорбаланааччыны туппуттар — Иркутскай уобаластан төрүттээх, урут сууттана сылдьыбыт 48 саастаах киһи эбит.
Барыллаан быһаарыынан, эмсэҕэлээччи уонна уорбаланааччы урут биир тэрилтэҕэ үлэлии сылдьыбыттар. Бу киһи дьахтарга хам-түм ыалдьыттыыр, арыгы иһэллэр эбит.
Ол кэлэ сылдьан, кыһыл көмүс оҥоһуктар баар шкатулкаларын өйдөөн көрбүт. Бастакы сырыытыгар кыһыл көмүс сыапачканы, кириэһи, браслеты уонна фианит таастаах биһилэҕи уорбут, иккиһигэр — эмиэ кыһыл көмүс сыапачканы.
Бу чахчынан «Уоруу» ыстатыйанан холуобунай дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.